Nursultan Nazarbaev qorynyń bastamasymen qolǵa alynǵan forýmda Úkimet músheleri, korporatıvtik sektor men sarapshylar qaýymdastyǵynyń ókilderi, sol sekildi sıfrly servısterdi ázirleýshiler men IT kompanııalardyń basshylary sıfrly tehnologııalarǵa baılanysty ózekti máseleler talqylap, pikir almasty.
«Karantındik shekteýler sıfrlandyrý úderisiniń tez damýyna yqpal etkenine kýá boldyq. Kez kelgen daǵdarys sekildi pandemııa da adamzatqa syn-qaterdi ǵana emes, jańa múmkindikterge de jol ashty. Ashyq ınnovasııalar formaty jedeldetilgen sıfrly transformasııa syndy ózekti úrdiske aınaldy.
Sıfrlandyrý men ashyq ınnovasııalar salasynda belgili qaýip-qaterler de bar ekenin túsinemiz. Qazir kásibı ortada kıberqaýipsizdik jáne jeke derekterdi qorǵaý máseleleri jıi aıtylady. Elektrondy kommýnıkasııa salasyndaǵy sońǵy oqıǵalar munyń qanshalyqty mańyzdy ekenin kórsetti. Ashyq ınnovasııalar qoǵamdyq, memlekettik jáne korporatıvtik ınstıtýttar tıisti deńgeıde damyǵan kezde ǵana tıimdi ekenin baıqata alady», degen Nursultan Nazarbaev qory atqarýshy dırektorynyń orynbasary Álkeı Marǵulanuly atalǵan qordyń dırektory Darıǵa Nazarbaevanyń baıandamasyn jetkizdi.
Spıkerler ótkizilip otyrǵan forým Qazaqstannyń sıfrly júıesin damytyp, tıimdi iske asyrýǵa múmkindik beretin quraldardy anyqtaýǵa yqpal etetinine senimdi. «Sıfrly transformasııa qoǵamnyń barlyq salasynda óte mańyzdy. Qazaqstan bul baǵytta jaqsy tabysqa qol jetkizedi dep senemin. RoboCup konfederasııasynyń jarysyna qazaqstandyq stýdentter kóp qatysady. RoboCup – ýnıversıtetterdiń, ǵylymı-zertteý ınstıtýttarynyń jáne ónerkásiptiń damýyna qomaqty úles qosatyn talanttardyń naǵyz ınkýbatory», dedi RoboCup Azııa-Tynyq muhıty halyqaralyq konfederasııasynyń (RCAP) prezıdenti Chanszıý Chjoý.
Halyqaralyq sarapshy elimizdiń IT-tehnologııalardy damytyp, engizýge qatysty jumystaryn oń baǵalady.
Forýmnyń alǵashqy kúni mamandar «Ashyq ınnovasııalar jáne jańa sıfrly shyndyqtyń syn-qaterleri», «Sıfrlandyrý jáne quqyq: jańa syn-qaterler», sondaı-aq «GovTech jáne DigitEl: bul ne jáne ne úshin kerek?» syndy qyzyqty taqyryptarda pikir almasty. Sonymen qosa bul jıynda qazaqstandyq startaptardyń sheteldik naryqqa shyǵýy, IT-aýtsorsıngti damytý jáne otandyq ýnıversıtetterdiń jańa tehnologııalyq jobalardy daıyndaýǵa qatysý múmkindikteri pysyqtaldy.
Budan bólek, KazRoboProject-2021 robottehnıka baıqaýy men Smart Zholy jobasynyń jeńimpazdary anyqtalady. Jyl saıyn robottehnıka birinshiligi (10 jastan 21 jasqa deıingi jastar arasynda ótkiziledi) elimizdiń barlyq óńirinen ondaǵan jas ónertapqyshtyń esimin jarııalaıdy. Smart Zholy baǵdarlamasy bolashaǵy zor IT-startaptardy qoldap, úzdikterin halyqaralyq deńgeıge shyǵarýǵa baǵyttalǵan. Baǵdarlama jeńimpazdary birneshe jyl qatarynan Sıngapýrdaǵy Ońtústik-Shyǵys Azııanyń iri startap alańynda jobalaryn usynǵanyn aıta ketken oryndy.
