О́tken ǵasyrdyń toqsanynshy jyldary Berik Jetpisbaev elimizdiń beldi balýandarynyń sanatynda boldy. Baqyt Qoqysbekovteı maıtalman mamannan tálim alǵan Jetisý óńiriniń týmasy sambo kúresin serik etip, tolaǵaı tabystarǵa qol jetkizdi. Áýelde Iýgoslavııanyń Novı-Sad qalasynda ótken jastar arasyndaǵy álem chempıonatynda bas júldeni oljalady. Kóp uzamaı eresekter dýyna erkin qosylyp, bıik belesterdi birinen soń birin baǵyndyrdy. Atap aıtsaq, 1996 jyly Tokıoda shymyldyǵy túrilgen álem chempıonatynda 20 jastaǵy balýan qola júldeni qanjyǵasyna baılady. Eki dúrkin Azııa chempıony atanyp, birneshe márte Álem kýbogynda kúmis medaldy ıelendi. Basqa da baıraqty básekelerde jeńis tuǵyryna kóterilgen Jetpisbaev elimizdiń sporttyq dańqynyń asqaqtaýyna súbeli úles qosty.
Beriktiń bir qasıeti, ol ózge balýandar sekildi bozkilemde yrǵalyp-jyrǵalyp júrip almaıtyn. Beldesýge shyqqan bette birden qarsylasynyń jaǵasyna jaramasatyn nemese belden qapsyra qushaqtap alatyn. Sóıtip qos jaýyrynymen jerge qadaıtyn. О́ziniń osy ońtaıly ádisin júzege asyryp, taza jeńiske jetkende ǵana jany jaı tabatyn. Jetpisbaev qorqýdy, qaımyǵýdy bilmeıtin. Aldynda ataq-dańqy jer jarǵan dúleı tursa da «ólispeı berispeýge» bekinetin. Osy qasıetteri úshin ony áriptesteri men bapkerleri ǵana emes, kánigi qarsylastary da syılaıtyn. О́zgelerdi aıtpaǵanda, qazaq sambosynyń akademıgi Kereı Qoıshybektiń ózi: «Berik – týma talant. Eger ár jattyǵý barysynda janyn salyp daıarlanyp, ár jekpe-jekte dáp osylaı jankeshtilik tanytsa, onyń shoqtyǵy bıik bolatynyna esh kúmánim joq. О́ıtkeni nar táýekelge baryp, mynadaı kesek ádister jasaýǵa ekiniń biriniń júregi daýalaı bermeıdi», dep jas jigittiń ónerine tamsanǵany da esimizde.
Sambodan halyqaralyq dárejedegi sport sheberi deńgeıine jetkennen keıin Berik Jetpisbaev dzıýdoǵa aýysty. Japondar oılap tapqan kúres túrinde de qandasymyz tasada qalǵan joq. Talaı chempıondardyń tomaǵasyn sypyrǵan bilikti bapker Manarbek Taýtanovtyń qol astynda jattyqqan ol birden dara talantymen oqshaýlandy. Qalyń toptyń arasynan sýyrylyp shyǵyp, talaı dúbirli dúrmekte óziniń myqtylyǵyn moıyndatty. Kil myqtylar jınalǵan elimizdiń eń úzdik dzıýdoshylarynyń qataryna erkin qosyldy.
– Tabys adamǵa ózdiginen kelmeıdi. Tipti jankeshti jattyǵý men jan alysyp, jan berisken aıqastyń ózi bıik tuǵyrǵa kóterilý úshin jetkiliksiz. Eń birinshi kezekte, ózińe degen senimiń myǵym jáne alǵa qoıǵan maqsatyń aıqyn bolýy kerek. Jáne de elishilik jarystarda básekelestik kúshti bolsa, shetelde kúresý áldeqaıda jeńil. Al meniń alǵa qoıǵan maqsatym halyqaralyq dodalarda qazaqtyń abyroıyn asqaqtatý edi. Sol jospardy júzege asyra alatynyma senimdi boldym. О́ıtkeni elishilik jarystardyń ózinde kileń yǵaı men syǵaılarǵa qarsy turdym. Aıdyn Smaǵulov, Muratbek Qypshaqbaev, Qaırat Kúnsafın, Aıdar Qaıyrbaev, Erlan Silámbaı... Alǵashqysy Olımpıada júldegeri atandy, qalǵandary qurlyqtyq deńgeıdegi dodalarda oza shapty. Bul jigitterdi birde utsam, birde utyldym. Osyndaı súzgiden ótken soń sheberligim shyńdaldy, deńgeıim ósti. Mine, endi dál osy qasıetterdi men tek óz shákirtterimniń ǵana emes, búgingi barsha jastardyń boıynan kórgim keledi, – deıdi Qazaqstan Respýblıkasynyń eńbek sińirgen jattyqtyrýshysy Berik Jetpisbaev.
Negizinde keıipkerimizdiń Atlanta jáne Sıdneı Olımpıadalaryna da qatysýyna múmkindigi boldy. Biraq ǵalamdyq dodanyń ekeýine de joly túspedi. Onyń ózindik sebebi de bar. Birinshiden, qazaqta «Joqshylyq jomarttyń qolyn baılaıdy» degen sóz bar. Naǵyz kemeline kelgen shaǵynda Berikke qamqorlyq kórsetip, baǵyt silteıtin eshkim bolmady. Iá, toqsanynshy jyldary ondaı qıyndyqty basynan ótkermegen sportshylar kemde-kem shyǵar. Ekinshiden, sońǵy kezderi ol kóp jaraqattandy. Jattyǵý kezinde Beriktiń ózinen salmaǵy áldeqaıda aýyr balýandarmen arpalysyp jatqanyn kórip júrdik. Ol «dıirmen» ádisin oryndaýǵa asa qushtar edi. Bapkerleri men áriptesteri «Alyptarmen aıqasyp neń bar, belińe zaqym keledi» dep talaı márte eskertti. Jastyqtyń býy ǵoı, bula kúsh ıesi aqylshy aǵalarynyń sózine qulaq aspady. Keıinnen sonyń zardabyn tartty. Jaýapty bir jarys qarsańynda belinen shoıyrylyp, tura almaı qalǵanyna da kýámiz. Mine, osy jaıttyń barlyǵy 2001 jyly Jetpisbaevtyń úlken sporttan qolúzýine ákelip soqtyrdy. Sóıtip ol boz kilemmen nebári 25 jasynda qosh aıtysty.
Desek te Jetisý óńiriniń atqaminer azamattary ataqty balýannyń el sportyna sińirgen eren eńbegin umytqan joq. Jýyrda olar Qapshaǵaıda Berik Jetpisbaevtyń qurmetine dúrkiretip jaqsy bir jarys ótkizdi. Qalalyq balalar men jasóspirimder sport mektebiniń basshylyǵy jáne dzıýdo bóliminiń aǵa jattyqtyrýshysy Asqar Kósherbaevtyń uıytqy bolýymen uıymdastyrylǵan týrnırdiń deńgeıi de joǵary boldy. Eń bastysy, osy jarysty basynan aıaǵyna deıin tamashalaǵan maıtalman mamandardan bastap, qarapaıym kórermenderge deıin elimizdiń ár qıyrynda daryndy jetkinshekterdiń qalyń shoǵyry ósip kele jatqanyna kýá boldy. Osyǵan qalaı qýanbaısyń?!
