Elimizde jeke kásipkerdi tirkeýden bastap, arnaıy salyq rejimderin tańdaý, esep-qısap pen shyǵys-kiristerdi júrgizý jumystarynda aıtarlyqtaı qıyndyqtar kezdesedi. Mundaı rásimderge ýaqyt ta kóp ketedi. Sondyqtan Memleket basshysy kásipkerler úshin salyq mindettemelerin oryndaý rásimderin jeńildetý jóninde arnaıy tapsyrma bergen bolatyn. Osy mindetti júzege asyrý maqsatynda jáne bıznes sýbektileriniń júmysyn jeńildetý úshin Memlekettik kirister komıteti E-Salyq Business mobıldi qosymshasyn ázirlep shyǵardy. Bul júıede kásipkerlerdiń salyq tóleýine baılanysty barlyq qyzmet túri qamtylǵan.
Memlekettik kirister komıteti tóraǵasynyń orynbasary Jaıdar Ińkárbaevtyń aıtýynsha, qosymshany júktep alǵan kásipkerge salyq bólimshelerine barýdyń qajeti joq, eshqaıda shyqpaı-aq, telefondaǵy qosymshamen barlyq sharýany bitirýge bolady. Qysqasha aıtqanda, E-Salyq Business qosymshasy – kásipkerlerdiń memlekettik kiris basqarmalaryna baryp alatyn qyzmetteriniń telefondaǵy nusqasy. «Qosymshany qoldanýdyń artyqshylyǵy sol, kásipkerler salyqtar men áleýmettik tólemderdi esepteýden bosatylady. О́ıtkeni qosymsha kassa apparatynyń fýnsıonalymen jetildirilgen. Kassa túbirtekteri bazasynda kásipkerdiń kirisi aıqyndalady da sonyń negizinde salyqtar men tólemder avtomatty túrde ózi esepteledi jáne salyq deklarasııasy da avtomatty túrde toltyrylady. Buǵan qosa, salyq salýdyń jańa rejimin qoldanatyn kásipker salyq eseptiligin usynýdan bosatylady», deıdi J.Ińkárbaev Ortalyq kommýnıkasııalar qyzmetinde ótken brıfıngte.
E-Salyq Business qosymshasy ázirshe synaq retinde engizilip otyr. Sondyqtan kásipkerdiń bári birdeı ony qoldana almaıdy. Jobaǵa jeke kásipker retinde tirkelgender men arnaýly salyq rejimin qoldanatyndar ǵana qatysa alady. Kásipkerlik qyzmetti onlaın rejimde júzege asyrǵysy kelgen bıznes ókili qosymshany júktep, avtorızasııadan ótkennen keıin jeke kásipker retinde tirkeý qyzmetin tańdaýǵa tıis. Ol úshin servıs suraǵan saýaldarǵa jaýap berip, qajetti derektemelerdi toltyrý qajet.
«Qazirgi kezde mobıldi qosymsha Aqmola jáne Jambyl oblystarynda testileýden ótip jatyr. Búginde bas-aıaǵy 3,5 myńǵa jýyq kásipker osy qosymshaǵa tirkelip, paıdalanýda. Bıyl taǵy 100 myńǵa jýyq dara kásipkerdi jobaǵa qosý kózdelip otyr. Aldaǵy jyldan bastap qosymsha tolyq rejimde iske qosylady», deıdi J.Ińkárbaev.
Komıtet málimetine qaraǵanda, E-Salyq Business jańa mobıldi qosymshasy kásipkerlerdiń syn-eskertpesi men usynystaryn eskere otyryp, áli de jetildirile túspek. Atap aıtqanda, eńbek sharttary jónindegi derekterdi alý jáne berý úshin tıisti mınıstrlikpen birlese jumys isteý, kásipkerlerdiń banktik shottaryna kelip túsken aýdarymdar boıynsha ekinshi deńgeıli banktermen kelisimder júrgizý, olardan alǵan derekterdi qosymshaǵa engizý sekildi sharýalar aldaǵy jyldyń mindetinde tur.
Memlekettik kirister komıteti salyq kodeksiniń normalaryn qoldanýǵa daıyn bolý úshin jańa qosymshany basqa óńirlerge kezeń-kezeńimen taratyp, 2022 jyly biryńǵaı jer salyǵyn esepteıtin qyzmetti de qosymshaǵa engizýdi josparlap otyr.
E-Salyq Business mobıldi qosymshasyn ázirshe Play market-ten júkteýge bolady. Sonymen qatar App store jáne AppGallery-de qosymshany ornalastyrý jónindegi ótinimge jaýap alý rásimderi júrip jatyr. Jaqynda bul jelilerde de E-Salyq Business paıda bolmaq.
