«Búgingi tańda, memlekettik BAQ-daǵy qazaq tilindegi kontenttiń úlesi 78%. Onyń ishinde telearnalardaǵy kontent – 79,2%, baspa basylymdarda 84,50% jáne ınternet-resýrstarda – 59,81%. Osydan 10 jyl buryn memlekettik tilde aqparat taratatyn 6 saıt qana bolsa, búginde jaǵdaı múldem bólek (2009 jyldyń kórsetkishi: abai.kz, egemen.kz, jasqazaq.kz, qazaquni.kz, turkystan.kz, zamandas.kz.). Qazirgi tańda otandyq ınternet medıanyń shamamen 14% úlesin qazaqtildi saıttar quraıdy. Jyldan jylǵa qazaq tildi ınternet portaldardyń sany da, oqyrmandar qatary da artyp keledi. Sońǵy 2 jyl ishinde jańadan 46 saıt ashyldy», dedi Aıda Balaeva.
Sondaı-aq mınıstr otandyq medıada qazaq tilinde kontent jasaý – aqparattyq saıasattaǵy basym baǵyttardyń biri ekendigin aıtty. Bul saladaǵy atqarylǵan jumystyń kólemi de, sapasy da jyldan jylǵa artyp keledi.
«Árıne, memlekettik tildegi medıanyń belsendi damýy – birinshi kezekte qazaq tildi aýdıtorııanyń ósýine baılanysty. Sebebi bul qoǵam talaby. Suranys árqashanda usynysty týdyratyny belgili. Degemen san bar jerde sapa máselesin de umytpaýymyz kerek. О́kinishke oraı, qazir arzan málimet taratýǵa áýes «sary basylym» deńgeıinen ózgergisi kelmeıtin onlaın medıalar jeterlik. Qysqa ýaqytta mol qaralym jınaýdy basty maqsat etetin saıttar aq-qarasyn ajyratpaı jalǵan aqparat berýge, bir-birinen kóshirip basatyn sapasy tómen aýdarmalar men búkil kontenti tek qylmys hronıkasynan turatyn «jaǵa ustatar jańalyqtarǵa» ǵana áýes. Árıne, dástúrli basylymdardaǵy jazý tili men ınternettegi jazý stılinde aıyrmashylyq bar. Kóptegen aqparat saıttary málimetti qysqa ári jeńil jazýdy tańdaıdy. Sondyqtan búginde «Intıl» («Intil») jazý formasy uǵymy paıda boldy. Dese de jyldam aqparat taratýdy ǵana oılaıtyn saıttarda kóp jaǵdaıda til tazalyǵy bolmaıdy. Munyń ózi, birinshi kezekte qazaq tilin ınternet arqyly oqyp úırenetin óskeleń urpaqqa keri áser etetini anyq», dedi mınıstr.
Aıda Balaevanyń aıtýynsha, qazir ınternet saıttar – ámbebap habar taratý quralyna aınalǵan. Búginde bir saıttyń ishinen jazba aqparatty da, aýdıo habarlamany da, beıne-baǵdarlamalardy da tabýǵa bolady. Mysaly memlekettik qoldaýǵa ıe e-history.kz, adebiportal.kz, el.kz, inform.kz, baq.kz sııaqty saıttarda qazaq tilindegi materıaldar zamanaýı formattaǵy beıne jazbalar, aýdıopodkasttar oqyrmandarǵa qoljetimdi. Búginde jastar arasyndaǵy eń suranysqa ıe qosymshalardyń biri – «TikTok» áleýmettik jelisi. Bul rette, e-history.kz portaly «Tıktoker tarıhshy» paraqshasyn ashyp, jastarǵa jeńil ári qysqa túrde elimizdiń tarıhyn túsindiretin aqparat beredi.
