Jaǵdaı baqylaýda bolýy tıis

Keshe Premer-Mınıstrdiń birinshi orynbasary Baqytjan Saǵyntaev áleýmettik mańyzdy taýar túrlerine, kommýnaldyq tarıfterge baǵany turaqtandyrý, óńirlerdiń kóktemgi sý tasqynyna daıyndyǵy máseleleri boıynsha selektorlyq keńes ótkizdi, dep habarlady Premer-Mınıstrdiń baspasóz qyzmeti.   Búginde óńirlerde birinshi qa­jetti taýarlarǵa baǵanyń negizsiz ósip ketýine jol bermeý jóninde kúndelikti jumys júrgizilýde, dep atap ótti B.Saǵyntaev. Osy másele boıynsha oblys­tar­­dyń, Astana jáne Almaty qa­la­­la­rynyń ákimderi aqparattar berdi. 20 aqpanǵa qatysty áleýmettik mańyzdy azyq-túlik taýarlary boıynsha monopolııaǵa qarsy zańnamany buzý belgileri boıynsha 49 sýbektige qatysty 14 tergeý bas­taldy, dedi básekelestikti qorǵaý agenttigi tóraǵasynyń orynbasary T.Baımuhanov. Munaı jáne gaz vıse-mınıstri M.Myrzaǵalıev bútindeı al­ǵan­da, respýblıkada JJM baǵa­larynyń ózgermegenin jáne taıaý ýa­qyt­ta baǵa ósýiniń bol­­ja­­­nyp  otyrmaǵanyn  habarlady. Oblys ákimderi birqatar óńir­lerde jekelegen taýar túr­lerine keıbir baǵa ósýi týraly habarlady. Sonymen birge, olar dúrbeleń men azyq-túlik tapshylyǵynyń oryn almaǵanyna sendirdi. Osyǵan baılanysty birinshi vıse-premer ákimdikterge saýda núkteleriniń úzilissiz jumys isteýin qamtamasyz etýdi, negizgi azyq-túlik ónimderi men JJM baǵalaryna kún saıyn monıtorıng júrgizýdi tapsyrdy. Tótenshe jaǵdaılar mınıstri Vladımır Bojko, QOSRM, KKM ókilderi  sý tasqyny ahýaly men oǵan qarsy qoldanylatyn sharalar týraly baıandady. Sol sııaqty oblys ákimderiniń orynbasarlary da kóktemgi sý tasqynyna daıyndyq barysy týraly aıtyp berdi. Búginde sý tasqyny kezeńinde tasqyn jaǵdaılaryna qarsy áreket etý jospary men múddeli vedomstvolardyń ózara is-qımyl jospary ázirlendi. Erneýin buzyp ketý qateri bar iri sý qoımalarynyń sýǵa tolý jaǵdaıyna monıtorıng júrgizilýde, dedi B.Saǵyntaev. So­nymen birge, ol Qazaqstan aýma­ǵynda qardyń birkelki jınal­ǵanyn, tek Qostanaı jáne Aqtaý oblystarynda onyń tıisti normadan artyq ekenin atap kórsetti. Osyǵan oraı, TJM-ǵa ákim­diktermen birlesip, tasqyn zardaptaryn joıýǵa qajetti kúshter men quraldardyń daıyndyǵyn tekserý tapsyryldy. Áleýmettik mańyzdy azyq-túlik ónimderine baǵany turaqtandyrý sharalary boıynsha halyqqa túsinik jumystaryn júrgizý biz­diń birinshi kezekti mindetimiz. Sony­men birge, óńirler sý tasqyny kezeń­ine daıyndyq boıynsha júıeli sharalar qabyldaýy qajet, dep atap ótti B.Saǵyntaev.