Juma kúngi daýys berý nátıjesinde qujatty 228 depýtat qoldasa, 206-y qarsy bolǵan. Sóıtip, prezıdent Djo Baıdenniń talaıdan beri aıtyp kelgen jospary júzege asty. Bul – demokrattardyń úlken jeńisi.
Baıden ákimshiligi endi Amerıkanyń avtomobıl joldaryn, temirjoldaryn jáne basqa da kólik ınfraqurylymyn jańartpaq. Aq úı basshysy jańa jumys oryndaryn qurýǵa jáne AQSh-tyń básekege qabilettiligin arttyrýǵa ýáde bergen edi.
Áıtse de, demokrattar Baıdenniń ishki baǵdarlamasynyń ekinshi baǵyty boıynsha áli kóp jumys isteýi kerek. Atap aıtqanda, áleýmettik qaýipsizdik jelisin keńeıtý jáne klımattyń ózgerýimen kúresý baǵdarlamalaryn Kongreste qabyldaýǵa kúsh salýy tıis. Baǵasy 1,75 trıllıon dollardy quraıtyn bul qujat AQSh qaýipsizdik jelisin 1960 jyldardan keıin qaıta jańartatyn edi.
Demokrattar bul qujatty da juma kúni talqylaýǵa shyǵarýǵa tıis-tuǵyn. Biraq onyń qunyna qatysty suraqtar týyndaǵandyqtan, zań jobasyn keıinge qaldyrdy. Bul máseleniń anyq-qanyǵyn naqtylaýǵa birneshe apta ketedi.
Al ınfraqurylymǵa qatysty qujattyń qabyldanǵany Baıdenniń abyroıyn ósiretini anyq. Kongress otyrysynan keıin Aq úı basshysy arnaıy málimdeme jasap, iske kirisetin sát kelgenin jetkizdi.
Birikken metallýrgııalyq kásipodaq zań jobasynyń qabyldanýyn quptady. «О́kilder palatasy eldiń mańyzdy ınfraqurylymyn jańartýǵa shamamen 1 trıllıon dollar bóletin Infrastructure Bill zańyn qabyldady. Bul biz úshin úlken mámile, óıtkeni bolat óńdeýshiler Amerıkany qamtamasyz etedi!» dep jazdy odaq týıtterdegi paraqshasynda.
