Alǵashqy eki kúnde jeti salmaqtyń altaýynda Almaty oblysynyń órenderi aldaryna jan salmasa, keshe jergilikti sportshylarǵa birde-bir bas júlde buıyrmady. Áıelder arasynda 64 kılo salmaq dárejesinde Shyǵys Qazaqstan oblysynyń ókili Darıa Pavlova dara shyqty. Onyń kórsetkishi – 197 (88+109) kılo. 71 kılo salmaqta Aısha Omarova altynnan alqa taqty. Osy jarysta qaraǵandylyq ziltemirshi óziniń sheberlik deńgeıi ózge sportshylardan áldeqaıda joǵary ekenine kópshiliktiń kózin jetkizdi. Aısha óziniń basty qarsylasy aqmolalyq Ekaterına Stolıarenkodan baqandaı 27 kılo artyq salmaqty eńserdi.
Erlerdiń 73 kılo salmaqtaǵy saıysynda 16 jastaǵy Denıs Polýbaıarınov jeńiske jetti. Qostanaılyq ziltemirshi 318 (138+180) kılolyq ziltemirdi esh qınalmaı kóterdi. Osy jarystyń favorıti jasóspirimder arasyndaǵy álem birinshiliginiń jeńimpazy, 19 jastaǵy Saıhan Taısýev kúmis medaldy qanaǵat tutty.
