«2020 jyldyń qorytyndysy boıynsha elimizde sýmen jabdyqtaý qyzmetterine qoljetimdilik 94,1%-dy qurady, onyń ishinde: aýyldarda - 90,1%, qalalarda - 97,5%. Osy jyldyń josparly kórsetkishteri aýyldarda – 91,8%, qalalarda - 98%», dedi Qaıyrbek О́skenbaev Májilistegi dóńgelek ústel barysynda.
Birinshi vıse-mınıstrdiń aıtýynsha, elimizdiń jekelegen óńirlerinde artta qalýshylyq baıqalady.
«Aýyl turǵyndaryn aýyzsýmen qamtýdyń eń tómengi deńgeıi Qostanaı oblysynda - 64,7%, Shyǵys Qazaqstan oblysynda - 81,4%, Soltústik Qazaqstan oblysynda - 82,1% jáne Jambyl oblysynda - 82,2% baıqalady», dep habarlady Qaıyrbek О́skenbaev.
Onyń aıtýynsha, elimizdiń túrli óńirleriniń turǵyndary taza aýyz sýǵa, tabıǵı gazǵa, kólik ınfraqurylymyna qoljetimdiliktiń ártúrli deńgeıine ıe.
«Osy teńsizdikti joıý boıynsha jumystardy jandandyrý qajet. Osyǵan baılanysty, qamtamasyz etilý kórsetkishteri tómen óńirlerge basym negizde qarajat bólinedi, Bul artta qalǵan óńirler kórsetkishteriniń deńgeıin arttyrýǵa múmkindik beredi», vıse-mınıstr.
Spıkerdiń aıtýynsha, «Aýyl – El besigi» arnaıy jobasyna engizilgen aýyldarǵa jáne óńirlerdi damytýdyń keshendi josparlaryna engizilgen jobalarǵa basymdyq beriledi. El boıynsha barlyǵy 6 316 aýyl, onyń ishinde 3 991 aýyl ortalyqtandyrylǵan sýmen qamtamasyz etilgen, 403 aýylda keshendi blok-modýlder ornatylǵan. Qamtamasyz etilmegen 1 922 aýyldyń 793-inde ortalyqtandyrylǵan sýmen jabdyqtaý qurylysyn jalǵastyrý josparlanýda, al 1 129 aýylda sýdy tazartýdyń jergilikti júıesi ornatylady.
«Bıyl taǵy 148 aýyldy ortalyq sýmen qamtamasyz etý jáne halqy az 220 aýylǵa KBM ornatý josparlanýda», dep atap ótti QR IIDM birinshi vıse-mınıstri.
