Shymkent – elimizdegi iri qalalar sapyndaǵy órisin keńge jaıǵan, halqy shaǵyn jáne orta kásipkerliktiń kózin tapqan, ekonomıkasy damyǵan, bastysy, búginnen bolashaǵy jarqyn shyraıly shaharlardyń biri. Statıstıkalyq derek boıynsha, Ońtústik Qazaqstan oblysynda 2,7 mln.-nan astam turǵyn bar, sonyń 850 myńǵa jýyǵy Shymkentte turady.
2012 jyly bekitilgen Bas josparǵa saı, qala aýmaǵy keńip, jańa ákimshilik iskerlik ortalyqtyń qurylysy qarqyndy júrgizilýde. Ultymyzdyń uıytqysy atanǵan óńirdiń jaǵymdy ımıdjin, áleýmettik-ekonomıkalyq jetistikterin, ınvestısııalyq áleýetin tanytýda Shymkent qalasynyń orny bólek.
Ońtústik Qazaqstanǵa jasaǵan jumys saparynda Memleket basshysy N.Á.Nazarbaev: «Shymkent − sáýletti qala. Tarıhqa tunyp tur. Astana, Almatydan keıingi Qazaqstannyń úshinshi qalasy − Shymkent degendi men buryn da aıtqanmyn. Halqynyń sany 1 mıllıonǵa jeterlik qalanyń kórki búgingisinen de kórkem bolady!» degen edi. Búginde osy bir sóz shyndyqqa aınaldy. Sońǵy jyldary Shymkent qalasyn abattandyrý, kógaldandyrý maqsatynda júıeli jumystar jasaldy. Nátıjesinde Abaı, Jeńis, ortalyq saıabaqtary men dendrosaıabaq kúrdeli jóndeýden ótip, jańǵyrtyldy. El táýelsizdiginiń 20 jyldyǵy qarsańynda jańa Táýelsizdik saıabaǵy salyndy. «Dańq», «Otan-Ana», «Memlekettik rámizder alańy» sııaqty birqatar sáýlettik nysandar boı kóterdi.
О́tken jyly jańa ákimshilik-iskerlik ortalyqta «Otyrar» kitaphanasy men Kórme ortalyǵy paıdalanýǵa berildi. «Naýryz» alańy ashylyp, S.Báıterekovtiń eskertkishi boı kóterdi. Bes myń oryndyq ortalyq meshittiń qurylysy aıaqtaldy.
Búginde qala aýmaǵyndaǵy Badam, Qoshqarata ózenderi mańyn abattandyrý, kóriktendirý jumystary jalǵasýda.
Oralhan DÁÝIT,
«Egemen Qazaqstan».
Ońtústik Qazaqstan oblysy.
