Indýstrııalandyrýda irkilis bolmaıdy

Keshe Ortalyq kommýnıkasııalar qyzmetinde Indýstrııa jáne jańa tehnologııalar mınıstriniń eki birdeı orynbasary – Albert Raý men Nurlan Saýranbaev baspasóz máslıhatyn ótkizdi. Olar údemeli ındýstrııalyq-ınnovasııalyq damý baǵdarlamasy boıynsha ekinshi besjyldyqqa josparlanǵan is-sharalar jóninde aıtty. Birinshi vıse-mınıstr A.Raýdyń sózine qaraǵanda, ındýstrııalandyrýdyń ekinshi besjyldyǵynda taý-ken men munaı-gaz sektory negizgi salalar bolyp qala beredi eken. «Údemeli ındýstrııalyq-ınnovasııalyq damý baǵdarlamasynyń ekinshi besjyldyǵy birinshi besjyldyqqa negizdeledi. Bıyl birinshi besjyldyq aıaqtalyp, qorytyndylanady. Memleket basshysy baǵdarlamanyń ekinshi bólimin ázirlegende, birinshi besjyldyqtyń olqylyqtaryn eskerýdi tapsyrdy», dedi ol. Osy ýaqytta baǵdarlama daıyndalyp jatyr eken. Onyń ázirlenýine bıznes qaýymdastyǵy da atsalysýda. – Qara jáne tústi metallýr­gııa, ıaǵnı taý-ken kesheni men mu­naı-gaz sektory ekinshi bes­jyldyqta da negizgi sala bolyp qalady. Osyǵan oraı, kelesi bes­jyl­dyqta shıkizatty tereń óńdeý mindetteri tur. Bul mindet­ter birinshi besjyldyqtyń en­shi­sinde-tuǵyn, álemdik naryqtaǵy kúrdeli ahýalǵa baılanysty bul sharýanyń shamaly irkilip qalǵany ras. Buıyrtsa, ekinshi bes­jyldyqta bul jumys jalǵasady. «Arsellor­MıttalTemirtaý» aldynda turǵan jylyna 6 mln. tonna bolat óndirý mindeti de kelesi besjyldyqqa ótedi. Budan bylaı meılinshe shaǵyn metallýrgııa damytylady. Atap aıtqanda, shoıyn, qubyr, joǵary sapaly temir-rýdalyq shıkizat óndirisi alǵa basady. Al tústi metallýrgııadaǵy qazirgi óndiris kólemin saqtap qalýymyz kerek. Memleket basshysy qoıǵan mindetterge saı, búginde sırek metaldar óndirý boıynsha belsendi jumys jasalyp jatyr, dedi A.Raý. Baspasóz máslıhatynda mashına jasaý salasy da nazardan tys qalmady. Vıse-mınıstrdiń sózine baqsaq, mashına jasaý salasynyń barlyq sektory derlik ındýstrııalandyrýdyń ekinshi besjyldyǵyna enedi. Onda negizinen temirjol mashınasyn jasaý salasy basty nazarda kórinedi. Bul sala birinshi besjyldyqta jaqsy ósim kórsetkendikten, kelesi besjyldyqta da sol deńgeıden kórinýge qol jetkiziletindigi aı­tyldy. Sondaı-aq, shetelderge satý boıynsha úlken min­det qoıylyp, memleket bul ónim­niń eksportyna qoldaý kórse­týdi kózdep otyr. Avtokólik óner­kásibi týraly da bastalar bes­jyldyqqa naqty mindetter qoıylypty. «Buıyrtsa, 2019 jylǵa qaraı jylyna 200 myń avtokólik shyǵarý josparlanyp otyr. Olar qurastyrylady jáne óndiriledi», dedi A.Raý. Sondaı-aq, Elbasynyń qu­ry­lys materıaldary boıynsha bergen tapsyrmalary da oryndalý ústinde. Búginde birqatar qu­rylys materıaldarymen óz eli­mizdi qamtamasyz ete bastappyz. Kelesi besjyldyqta sement, armatýra, kafel-plıta sııaqty qurylys materıaldarymen ishki naryqtaǵy suranys tolyq qamtamasyz etilmek. Sanfaıans jóninde de birqydyrý jumys atqarylyp, Qyzylordada taǵy bir shyny jasaıtyn zaýyt jobasy qolǵa alynypty. Nurbaı ELMURATOV, «Egemen Qazaqstan».