Atalmysh saıys úsh kúndik taktıkalyq oqý-jattyǵý túrinde ótkizilip, alty túrli jarysty qamtydy. Jarystar barynsha urys jaǵdaıynda keltirilgen túrde ótti. Elimizdiń barlyq óńirinen 80-nen astam serjant qatysty.
Birinshi kezeńde qorytyndy tekserý nátıjeleri boıynsha óńirlik qolbasshylyqtar, ásker tekteri men Qarýly Kúshterdiń qurylymdyq bólimsheleri aýqymynda baǵynysty jeke quramnyń jaýyngerlik daıarlyǵy men áskerı tártibiniń deńgeıi baǵalandy. Ekinshi kezeńde jaýyngerlik ázirlik baıqaýy ótkizildi. Saıysqa qatysýshy serjanttar kedergiler jolaǵynan ótý, jergilikti jerdi baǵdarlaý, marsh jasaý jáne qoıan-qoltyq urysta baqtaryn synady.
– Bul saıysqa túsken ár serjant – ásker tekteri men óńirlik qolbasshylyqtardan laýazymdyq sanatyna qaraı iriktelgen, ujymda úzdik jáne kóshbasshy. Baıqaý barysynda ár óńirdiń úzdik serjanttary ózderiniń kásibı sheberlikterin kórsetti, – dep atap ótti QR QK Serjanttar quramymen jumys basqarmasynyń bastyǵy sheber-serjant Temirbek Halyqov.
Jarys barysynda qatysýshylar kásibı serjant pen kishi komandırlerge tán barlyq qabiletterin kórsetti: onyń ishinde dene shynyqtyrýdaǵy tózimdilik, oq atýdaǵy dáldik, qoıan-qoltyq urystyń úzdik daǵdylary, jergilikti jerdi baǵdarlaı bilý, hımııalyq qorǵaý quraldaryn qoldaný, alǵashqy medısınalyq kómek kórsetý. Jeńimpazdar alty atalym boıynsha anyqtaldy. Atap ótsek, brıgadanyń, batalonnyń, rotanyń, vzvodtyń, bólimsheniń úzdik serjanty, maman serjant jáne shtab serjanty.
«Astana» óńirlik qolbasshylyǵynyń áskerı bóliminen úzdik bólimshe komandıri kishi serjant Sábden Dúısembek saıystyń absolıýtti jeńimpazy bolyp tanyldy. Áskerı qyzmetshi bıyl jeltoqsan aıynda «Ásker tarlany» áskerı-patrıottyq baıqaýy aıasynda marapattalmaq. Onyń maqsaty – barlyq sanattaǵy áskerı qyzmetshilerdiń kásibı deńgeıin arttyrýǵa yntalandyrý.
Serjanttar korpýsy – kásibı armııanyń negizi. Áskerı daıyndyq, bólimshelerdegi áskerı tártiptiń jaǵdaıy jáne jeke quramnyń moraldyq-jaýyngerlik rýhy kóbinese serjanttardyń kásibı sheberligine baılanysty. Osyndaı saıysty ótkizý serjanttar quramynyń kásibı sheberligin arttyrýǵa yqpal etip, bul úrdistegi jarys rýhyn nyǵaıtady. О́ńirlik qolbasshylyqtar men ásker tekterinde kishi komandırlerdiń daıarlyq deńgeıin baǵalaýǵa múmkindik beredi.
