Joǵaryda atalǵan komandalardyń barlyǵy da qazirgi kezde óz qurlyqtarynyń úzdikteri. Máselen, Venesııa óńirindegi Trevızo provınsııasyna qarasty Konelıano dep atalatyn shaǵyn ǵana qalada jasaqtalǵan «Imoko Volleıdiń» Italııanyń tórt dúrkin chempıony, sol eldiń Sýperkýbogynyń tórt márte ıegeri, Eýropa Chempıondary lıgasynyń jeńimpazy jáne taǵy basqa tolyp jatqan ataqtary bar. 2019 jyly dál osy ujym álemniń klýbtyq chempıonatynda bas júldeni oljalady. Bir ǵajaby, 2020-2021 jyldary olar tórt birdeı asa iri halyqaralyq dodalarǵa qatysyp, barlyǵynda jeńiske jetti. Sol jarystarda Apennın túbeginiń arýlary 45 kezdesý ótkizip, birde-bir ret jeńilistiń kermek dámin tatqan joq. Bul kúnderi Danıele Santarellı jattyqtyratyn komandanyń sapynda polshalyq Ionna Volosh, ıtalııalyq Paola Egoný, Rafaela Fole, Monıka Dı Djennaro, Sara Far, Lovet Omorýıı, amerıkalyq Ketrın Plammer men Megan Kortnı, horvatııalyq Bojana Býtıgan jáne bolgarııalyq Hrıstına Výchkova syndy voleıbolshylar óner kórsetedi.
Túrkııanyń «VakyfBanky» 2013, 2017 jáne 2018 jyldary klýbtyq álem chempıonatynda dara shyqsa, 2011 jyly kúmis medaldi ıelendi. Al 2016 jáne 2019 jyldary qola júldeni enshiledi. Sońǵy jarystyń jartylaı fınalynda túrkııalyqtar dál sol «Imoko Volleıge» ese jiberse, úshinshi oryn úshin básekede Italııanyń «Igor Gorgondzolasyn» oısyrata utty. Ystanbuldyq voleıbolshylar tórt ret qart qurlyqtyń teńdessizi dep tanyldy. Sondaı-aq olar óz eliniń san márte chempıony jáne túrli kýboktardyń ıegerleri. Bir sózben aıtsaq, sońǵy jyldary atalǵan memlekettegi eshbir ujymy «VakyfBankke» toıtarys bere almaı júr. Bul komandanyń búgingi tańdaǵy basty juldyzdary – Chıaka Ogbogý men Mıshel Barch-Haklı. Ekeýi de bıyl AQSh quramasy sapynda Olımpııa oıyndarynyń jeńimpazy atandy. «VakyfBanktyń» quramynda Brazılııa men Shvesııadan kelgen bir-bir legıonerden bar, al qalǵandary jergilikti oıynshylar.
Túrkııanyń taǵy bir klýby «Fenerbahcheniń» de baǵyndyrǵan belesteri bir tóbe. Irgetasy sonaý 1927 jyly qalanǵan ujym Túrkııa birinshiliginde 13 márte top jardy. 2010 jyly klýbtyq álem chempıonatynda altynnan alqa taqsa, 2012 jyly qolaǵa qol sozdy. 2012 jyly Chempıondar lıgasynda jeńiske jetse, taǵy úsh ret júldegerler qataryna qosyldy. Serbııalyq maman Zoran Terzıch tizginin ustaǵan komandada brazılııalyq Anınıa, reseılik Anna Lazareva men Arına Fedorovseva, serbııalyq Mına Popovıch jasyndaı jarqyldaýda. О́z eliniń oıynshylary arasynda da asqan sheberligimen jankúıerlerdi tánti etip júrgen voleıbolshylar az emes.
Ońtústik Amerıkadan at terletip kelgeli otyrǵan eki komandanyń da shabysy shıraq. Olardyń ekeýi de Brazılııanyń birneshe dúrkin chempıondary, qurlyqtyq jarystarda da san márte jeńis tuǵyrynyń eń bıik satysynan kórindi. Máselen, «Mınas» byltyr Latyn Amerıkasynyń klýbtyq chempıonatynyń jeńimpazy atansa, «Dentıl-Praıa» sol ataqqa bıylǵy maýsymda qol jetkizdi. Odan bólek, «Mınastyń» boıshań burymdylary 1992 jáne 2018 jyldary ótken álem birinshilikterinde kúmis medaldi moıyndarynda jarqyratty.
Mine, О́skemenniń «Altaıyna» Anadoly elinde osyndaı myqty komandalarmen kúsh synasýǵa týra kelip otyr. Jerlesterimiz álemdik deńgeıdegi jarystarda eleýli tabystarǵa qol jetkize almaǵanymen, qurlyqtyq dodalarda ózderin jaqsy qyrynan kórsetýde. Bıyl Taılandtyń Nakhonratchasım qalasynda ótken Azııa birinshiliginde qazaqstandyq voleıbolshylar qarsylas shaq keltirmeı, altynnan alqa taqty. Osy jarqyn jeńisiniń nátıjesinde Kendi Altaıdyń arýlary álemniń eń myqty komandalarymen kúsh synasý qurmetine ıe boldy.
