«2021 jylǵy qazanda respýblıkalyq bıýdjetten zeınetaqy tólemderine 221,1 mlrd teńgeden astam, onyń ishinde bazalyq zeınetaqyny tóleýge - 67,9 mlrd teńge, yntymaqty zeınetaqyny tóleýge - 153,2 mlrd teńge baǵyttaldy. 2021 jylǵy 1 qarashadaǵy jaǵdaı boıynsha zeınetkerler sany 2 mln 230 myńnan astam adamdy quraıdy. 2021 jylǵy 1 qarashadaǵy jaǵdaı boıynsha zeınetaqy tólemderiniń ortasha mólsheri (bazalyq zeınetaqy tólemin eskere otyryp) 99 804 teńgeni qurady», dep habarlady Eńbek jáne halyqty áleýmettik qorǵaý mınıstrliginiń baspasóz qyzmeti.
2018 jylǵy 1 shildeden bastap memlekettik bazalyq zeınetaqy tólemi árbir alýshyǵa onyń zeınetaqy júıesine qatysý ótilin eskere otyryp, jeke taǵaıyndalady.
Bul rette zeınetaqy júıesine qatysý ótiline 1998 jylǵy 1 qańtarǵa yntymaqty júıede jınaqtalǵan eńbek ótili, sondaı-aq mindetti zeınetaqy jarnalary tólengen kezeńder qosylady.
Máselen, eger zeınetaqy júıesine qatysý ótili 10 jáne odan az jyldy qurasa, sondaı-aq ol bolmaǵan kezde bazalyq zeınetaqy mólsheri eń tómengi kúnkóris deńgeıiniń 54%-na teń bolsa, odan ári 10 jyldan asatyn árbir jyl úshin onyń mólsheri 2%-ǵa artady. Mysaly, 20 jyl qatysý ótili kezinde bazalyq zeınetaqy eń tómengi kúnkóris deńgeıiniń 74%-yn, 30 jyl - eń tómengi kúnkóris deńgeıiniń 94%-yn quraıdy. Eńbek ótili 33 jáne odan kóp jyl bolǵan jaǵdaıda ol eń tómengi kúnkóris deńgeıiniń 100%-y mólsherinde belgilenedi.
«Eger Biryńǵaı jınaqtaýshy zeınetaqy qoryna MZJ aýdarý bir aıda birneshe ret júzege asyrylsa, jınaqtaýshy júıege qatysý kezeńi bir aıdy quraıdy. Osylaısha, mindetti zeınetaqy jarnalary qanshalyqty turaqty jáne tolyq kólemde tólenetin bolsa, zeınetaqy jasyna jetken kezde bazalyq zeınetaqy tóleminiń mólsheri de sonshalyqty joǵary bolady. О́z kezeginde jasyna baılanysty zeınetaqy tólemderiniń mólsheri 1998 jylǵy 1 qańtardaǵy jaǵdaı boıynsha eńbek ótiline (keminde 6 aı talap etiledi) jáne zeınetaqy aldyndaǵy kezeńde alynǵan ortasha aılyq kiriske baılanysty», dep habarlady vedomstvodan.
