Jıyn barysynda joǵary oqý oryndarynyń bilim berý sapasy jáne joǵary oqý oryndaryn lısenzııalaý modelin qaıta qaraý, olardy qarjylandyrý jáne granttar bólý, mamandyqtarǵa qoıylatyn biliktilik talaptaryn arttyrý máseleleri talqylandy.
Ashat Aımaǵambetov mınıstrliktiń óńirlerdegi bilim berý sapasyn qamtamasyz etý jónindegi komıtet basshylarymen ortalyqtandyrylǵan sapa júıesine kóshý boıynsha júrgizgen jumystaryn atap ótip, atalǵan qurylymdardyń qyzmetindegi ózgerister týraly baıandady. Mınıstrdiń aıtýynsha, olardyń jumysyn neǵurlym júıeli etý, problemalar men olardy sheshý joldaryn naqty anyqtaý, joǵary oqý oryndary men kolledjderdiń qyzmetin baqylaý jónindegi sharalardy kúsheıtý, lısenzııalar berý talaptaryn qatańdatý qajet. Akkredıtteý agenttikterine qatysty sapany qamtamasyz etý júıesiniń ulttyq standartyn engizý jáne reıtıngti baǵalaý ádisnamasyn qaıta qaraý josparlanýda. Básekege qabiletti joǵary oqý oryndarynyń Lıgasy qurylady. Lıga múshelerine qoıylatyn negizgi kórsetkishter men talaptar Qazaqstan Respýblıkasynyń Bilim jáne ǵylym mınıstrligi joǵary oqý oryndarynyń rektorlarymen birlesip ázirleıdi.
Gúlzat Kóbenova joǵary bilim berý sapasy men mınıstrlik qabyldaǵan sharalar, joǵary oqý oryndarynyń jaýapkershiligin arttyrý, lısenzııalaý modelin qaıta qaraý qajettiligi, bilim berý baǵdarlamalaryn ázirleý jáne olardyń eńbek naryǵynyń talaptaryna sáıkestigi, óskeleń urpaqtyń adamı kapıtaly men zııatkerlik qabiletin arttyrý, Dıssertasııalyq keńes qurý, ǵylymı jýrnaldar men doktoranttardyń ǵylymı jumysyna jáne olardyń ǵylymı dárejeler alýyna qoıylatyn talaptardy kúsheıtý máselelerin atap ótti.
Abaı atyndaǵy QazUPÝ rektory Darhan Bilálov elimizdiń joǵary bilim berý júıesin jaqsartý jolyndaǵy aýqymdy jumysty atap ótti. Onyń pikirinshe, lısenzııalaýdy kúsheıtý – óte mańyzdy qadam. Bul ekonomıkanyń barlyq salalarynda mamandardy daıarlaý sapasynyń artýyna ákelip, joǵary oqý oryndarynyń básekege qabilettiligin arttyrady. Bul turǵyda paıdaly halyqaralyq tájirıbe de bar. Árıne, elimizdiń jetekshi pedagogıkalyq joǵary oqý orny Lıga quramyna kirýge umtylatyn bolady.
Kezdesý sońynda rektorlar joǵary oqý oryndaryn lısenzııalaý jáne akkredıtteý, ýnıversıtetter men akkredıtteý organdaryn ranjırleý, sheteldik joǵary oqý oryndary men sarapshylardy tartý, stýdentterdiń kásibı daıyndyq úderisterin baqylaý boıynsha jumys tobyn qurý jóninde óz usynystaryn bildirdi.
