«Jambyl jyraý» atty kitapqa Qyrǵyz Respýblıkasynyń Ulttyq ǵylym akademııasy men kitaphanasynyń arhıvterinen tabylǵan, buǵan deıin baspa betin kórmegen, ǵylymı aınalymǵa túspegen tyń Jambyldyń qyrǵyz aqyndarymen aıtystary, arnaý óleńderi, kórshi el ǵalymdarynyń tulǵa jaıyndaǵy zertteýleri toptastyrylǵan.
Konferensııada fılologııa ǵylymdarynyń doktory, akademık, jambyltanýshy Qalıjan Ýálıhan, aqyn, Qazaqstan Jazýshylar odaǵynyń tóraǵasy Ulyqbek Esdáýlet ǵasyr jasaǵan abyz aqynnyń shyǵarmashylyq qýaty, sheteldiń ádebıet maıtalmandarynyń joǵary baǵasy týraly tilge tıek etti.
«Biz – batyry da, aqyny da bar elmiz. Bizdiń qazaqtyń myqtylyǵy sonda. Álemdegi eń bıik taýdyń biri Alataý bolsa, álemdegi eń uly aqyndardyń biri – Jambyl Jabaev. Ǵalamshardyń aspanyn Alataý qalaı bıiktetse, adamzattyń aspanyn Jambyl aqyn solaı bıiktetken. Sondyqtan Alataý desek Jambyl babamyz eske túsedi, Jambyl desek Alataý kózge elesteıdi. Biz Jambyldyń zańǵar muztaýyn áli tereń zerttep bolǵan joqpyz dep esepteımin. Jambyl jyrlary kezinde álemniń 160 tiline aýdarylyp, jaryq kórgen», degen Ulyqbek Esdáýlet sheteldik jazýshylar Jambyldy HH-ǵasyrdyń Gomeri dep baǵalanyń aıtty.
Sondaı-aq, qoǵam qaıratkerleri, Senat depýtaty Nurtóre Júsip pen Májilis depýtaty Bekbolat Tileýhan, jazýshy Jumabaı Shashtaıuly, jazýshy-dramatýrg Elen Álimjan, májilis depýtaty Meırambek Tólepbergen, aqyn Dáýletkereı Kápuly, J.Jabaevtyń shóberesi Murathan Jambylov óz kezeginde tulǵanyń qazaq ádebıetine qosqan orasan úlesi, aıtyskerligi men kemeńgeriligi týraly tebirene sóz qozǵady.
Qyrǵyzstannan kelgen Sh.Aıtmatov atyndaǵy Til jáne ádebıet ınstıtýtynyń jetekshi ǵylymı qyzmetkeri Keldibek Qoılybaev pen aqyn, «Manasshylar» teatrynyń dırektory Ázız Bımyrza eki eldiń ádebı-mádenı baılanysyndaǵy Jambyl Jabaevtyń rólin aıryqsha atap ótti.
Basqosý barysynda qatysýshylar jyr alyby týraly tyń málimettermen bólisip, shyǵarmashylyǵyn tereńirek zertteý, keleshekke urpaqqa laıyqty nasıhattaý boıynsha birqatar oı-usynystaryn ortaǵa saldy.
