«Memlekettik bilim berý uıymdarynyń birinshi basshylaryn rotasııalaý qaǵıdalary Qazaqstan Respýblıkasy Ádilet mınıstrliginde tirkeldi.
Osylaısha, bilim berý júıesinde mektep, kolledj jáne balabaqsha dırektorlaryn rotasııalaý ınstıtýty paıda boldy.
Bilim berý salasynda on myńnan astam memlekettik uıym bar. Kóptegen basshylar, merzimsiz eńbek kelisimsharttaryn jasasqan.
Osyǵan baılanysty bir uıymda 10-15 jyl jáne odan da kóp jumys isteıtinder az emes. Árıne, olardyń arasynda óz jumysyn jaqsy biletin jáne mektep, kolledj, mektepke deıingi nemese qosymsha bilim berý uıymdarynyń damýyna eleýli úles qosatyn basshylar bar. Degenmen, 10-15 jyl boıy bir orynda otyryp, ózderiniń bastamashyldyǵy men damýǵa degen yntasyn joǵaltatyn mektep dırektorlary da bar», deıdi mınıstr.
Vedomstvo basshysy sózin jalǵaı otyryp, eger basshy uzaq jyldar boıy bir bilim berý uıymyn basqarsa, bul motıvasııanyń tómendeýine, jumys barysynda jańa tásilderdiń bolmaýyna ákelýi múmkin ekenin aıtyp ótti.
«Basshylyq etetin uıymnyń aýysýy ózgeristerdi engizýge jáne basshynyń jumystaǵy tıimdiligin arttyrýǵa múmkindik beredi. Endi Erejelerdiń negizgi basymdyqtaryna toqtalyp ótsem.
Birinshiden, bir bilim berý uıymynda 4 nemese 7 jyldan astam jumys istegen basshylar rotasııalanady.
Bul rette, osy bilim berý uıymynda laýazymǵa taǵaıyndalǵan kúnnen bastap 4 (tórt) jyl jumys atqarǵan birinshi basshy rotasııadan ótinishi negizinde bosatylyp, tıisinshe qoldanystaǵy eńbek sharty sheńberinde óz jumysyn jalǵastyra alady.
Alaıda, eger basshy atalǵan uıymda 7 jyldan astam ýaqyt jumys istese, onda ol mindetti túrde rotasııalanady. Osylaısha, bir bilim berý uıymyna jetekshilik etý merzimi 7 jyldan aspaýy tıis», dedi Ashat Aımaǵambetov.
Ekinshiden, rotasııalaýdyń tómendegideı sharttary bar:
- rotasııalaýdy oblystardyń jáne respýblıkalyq mańyzy bar qalalardyń bilim basqarmalary júzege asyrady;
- rotasııa bir eldi meken aýmaǵynda júrgiziledi;
- rotasııalaýdy bir deńgeıdegi uıym basshylary arasynda júrgizedi;
- rotasııalaý kezinde birinshi basshylardyń biliktilik sanaty, ıaǵnı atalǵan sanat úshin tólenetin qosymsha aqy da merzimi aıaqtalǵanǵa deıin saqtalady.
«Ashyqtyq pen obektıvtilikti qamtamasyz etý úshin rotasııalaý týraly máseleni qaraý úshin komıssııa jumys isteıtin bolady.
Rotasııalaý júıesiniń tıimdi jumys isteýi jáne tutastaı alǵanda bul qaǵıdalardyń jergilikti jerlerde durys iske asyrylýy úshin mınıstrlik monıtorıng júrgizetin bolady», dep jazdy mınıstr Facebook paraqshasynda.
