Is-shara Elbasy kitaphanasynyń «Qazaqstan joly» jobasy aıasynda uıymdastyryldy. Onyń negizgi ıdeıasy – bolashaq qoǵamdy qurýdyń serpindi prosesi retinde 30 jyl boıy elimizdiń óńirleri men qalalarynyń damýyn keń kólemde kórsetý.
Is-shara barysynda sóz alǵan Elbasy kitaphanasynyń dırektory Baqytjan Temirbolat: «Táýelsizdik kúni qarsańynda azattyqtyń altyn besigine aınalǵan Almaty qalasyna arnalǵan kórmemizdi ashýymyzdyń máni zor. Osydan týra 30 jyl buryn, 1991 jylǵy 1 jeltoqsanda munda búkilhalyqtyq Prezıdent saılaýy, 10 jeltoqsanda Memleket basshysynyń resmı ulyqtaý rásimi jáne 16 jeltoqsanda Qazaqstan Táýelsizdiginiń jarııalanýy syndy tarıhı oqıǵalar bolyp, egemen memleketimizdiń negizi qalandy», dedi.
2015 jyly Qazaqstan Respýblıkasynyń Tuńǵysh Prezıdenti Nursultan Nazarbaev «Almaty kóktemi» is-sharasynda sóılegen sózinde: «Almaty – máńgilik kóktem qalasy, Ortalyq Azııanyń injý-marjany... bul megapolıs Qazaqstan táýelsizdiginiń «altyn besigi», respýblıkamyzdyń jańa tarıhy bastalǵan jer», dep atap ótken bolatyn.
«Táýelsizdigimiz Almatyda jarııalandy. Sondyqtan bul shahardyń tarıhı róli aıryqsha. Qazir Almaty – ekonomıkamyzdyń basty qozǵaýshy kúshi», degen Memleket basshysy Q.Toqaevtyń sózinde de zor mán bar.
«Almaty – Táýelsizdiktiń altyn besigi» kórmesiniń basty maqsaty – Almaty qalasy arhıvteri men mýzeıleriniń, Elbasy kitaphanasynyń qorlarynan jınaqtalǵan qujat, sýret, jádigerler arqyly egemen el taǵdyryndaǵy Almaty qalasynyń orny men rólin kórsetý.
Almaty qalasynyń ákimi Baqytjan Saǵyntaev usynylǵan ekspozısııalar megapolıstiń Táýelsizdiktiń otyz jylyndaǵy jetistikterine arnalǵanyn atap ótti.
«Táýelsizdik jyldarynda Almaty ekonomıkasy 1993 jyldaǵy 2,1 mlrd teńgeden 2020 jyly 13,5 trln teńgege deıin ósti. Al JО́О́ jan basyna shaqqanǵa 342,5 AQSh dollardan 16,7 myń AQSh dollarǵa deıin artty. Halyq sany 1991 jylǵy 1 134 myń adamnan 2021 jyly 2 mln adamǵa deıin kóbeıdi. Táýelsiz Qazaqstan damýyndaǵy jańa kezeńde qala elimizdiń ǵylymı, bilim berý, zııatkerlik ortalyǵy bolyp qala beredi ári ultymyzdyń mádenı birliginiń nyshany bolyp sanalady», dedi B. Saǵyntaev.
«Almaty – Táýelsizdiktiń altyn besigi» kórmesi úsh bólimnen turady:
- «Táýelsizdiktiń bastaýynda» bóliminde 1986 jylǵy jeltoqsan oqıǵalary, 1991-1997 jyldardaǵy oqıǵalar hronıkasy, sondaı-aq Almaty qalasynda qabyldanǵan mańyzdy tarıhı sheshimder týraly materıaldar kesheni usynylǵan.
- «Qazaqstan joly: Almatynyń 30 jyldaǵy jetistikteri» bólimi megapolıstiń táýelsizdik jyldaryndaǵy áleýmettik, ekonomıkalyq, mádenı salalardaǵy, sondaı-aq sporttaǵy negizgi jetistikteri týraly materıaldardy kórsetedi. Kórermender ınteraktıvti túrde Almatynyń álemdik mádenıet pen órkenıetke qosqan úlesi men 1991-2021 jyldar aralyǵynda ońtústik astanada bolǵan 30 mańyzdy oqıǵamen tanysa alady.
- «Bizdiń bolashaǵymyz: Almaty-2050 strategııasy» bóliminde: Almaty – shetsiz qala; «aqyldy» qala; teń múmkindikter qalasy; qaýipsiz qala; jasyl qala; jahandyq iskerlik ortalyq; mádenı, kreatıvti qala syndy Almatynyń uzaq merzimdi damýynyń basty baǵdarlary men strategııalyq basymdyqtary kórsetilgen.
Beıbitshilik kóshesi, 11 mekenjaıyndaǵy Qazaqstan Respýblıkasynyń Tuńǵysh Prezıdenti – Elbasy kitaphanasynyń mýzeıindegi kórme 2022 jylǵy 28 qańtarǵa deıin jalǵasatyn bolady.
