Mazmundy is-shara Elbasy kitaphanasynyń «Qazaqstan joly» jobasy aıasynda uıymdastyrylǵan, onyń maqsaty – azattyqtyń alǵashqy araıly tańyn qarsy alǵan Alataýdyń etegindegi ásem shahardyń orny men rólin jarqyrata kórsetý.
Aıtýly kórmeniń ashylýynda Elbasy kitaphanasynyń dırektory Baqytjan Temirbolat azattyqtyń altyn besigine aınalǵan – Almatynyń kórkem kelbeti men róli týraly salmaqty sóz qozǵady. «Dál osydan 30 jyl buryn Almatyda 1991 jyly 1 jeltoqsanda – Prezıdent saılaýy, 10 jeltoqsanda – Memleket basshysynyń resmı ulyqtaý rásimi jáne 16 jeltoqsanda – Qazaqstan Táýelsizdigin jarııalap, derbes elimizdiń negizi qalandy» dedi ol.
Odan keıin Almaty qalasynyń ákimi Baqytjan Saǵyntaev kórmege usynylǵan ekspozısııalar megapolıstiń Táýelsizdigimizdiń otyz jyldyǵyndaǵy jetistikterine arnalǵanyn atap ótti.
− Arý Almatynyń elimizdegi orny bólek, ony Elbasy Nursultan Nazarbaevtyń ózi belgilep bergen. Táýelsizdigimiz aldymen Almatyda jarııalandy. Memleketimizdi búginge damý deńgeıine jetkizgen – ekonomıkalyq-áleýmettik, saıası reformalardyń bári Almatydan bastaldy. Elbasynyń sheshimimen el astanasy Almatydan Aqmolaǵa kóshirildi. Biraq budan Almaty utylǵan joq. Tuńǵysh Prezıdentimizdiń qoldaýymen Almatynyń jańa mártebesi boıynsha zań qabyldandy» deı kelip, azattyq jyldaryndaǵy tabıǵaty kórkem qalanyń ekonomıkasyna toqtaldy. Máselen, alyp shahardyń ekonomıkasy 1993 jyldaǵy 2,1 mlrd teńgeden 2020 jyly 13,5 trln teńgege deıin ósse, jalpy óńirlik ónim jan basyna shaqqanda 342,5 AQSh dollarynan 16,7 myń AQSh dollaryna deıin artqan. Halyq sany 1991 jylǵy 1 134 myń adamnan 2021 jyly 2 mln adamǵa deıin kóbeıgen.
Egemen eldiń júrip ótken jolyn baıan etken kórme úsh bólimnen turady, birinshisi − «Táýelsizdiktiń bastaýynda» dep atalady, oǵan 1986 jylǵy Jeltoqsan oqıǵasy men 1991-1997 jyldardaǵy oqıǵalar hronıkasy, sondaı-aq Almaty qalasynda qabyldanǵan mańyzdy tarıhı sheshimder týraly materıaldar kesheni usynylǵan. Al «Qazaqstan joly: Almatynyń 30 jyldaǵy jetistikteri» bóliminde megapolıstiń táýelsizdik jyldaryndaǵy áleýmettik, ekonomıkalyq, mádenı jáne sport jetistikterimen tanysasyz. Úshinshi – «Bizdiń bolashaǵymyz: Almaty-2050 strategııasy» bóliminde, «Almaty – shetsiz qala», «aqyldy» qala, teń múmkindikter qalasy, qaýipsiz, jasyl qala jáne jahandyq iskerlik ortalyq sekildi shyraıly shahardyń uzaq merzimdi damýynyń basty baǵdarlary men strategııalyq basymdyqtary kórsetilgen.
Mádenı sharaǵa Almatydan zııaly qaýym ókilderi de arnaıy kelipti, solardyń ishinen belgili aqyn, Qazaqstan Jazýshylar odaǵynyń tóraǵasy Ulyqbek Esdáýlet aǵamyzdy sózge tarttyq.
− Eger biz Qazaqstan deıtin Otanymyzdy qyranǵa teńesek, onyń qonyp-ushatyn tuǵyry – Almaty. Eger biz Qazaqstandy tulǵaly qaıratkerge teńeıtin bolsaq, onyń alǵashqy dúnıege shyr etip kelgendegi altyn besigi – Almaty. Eger biz Qazaqstandy aryndy, asaý tolqyndy ózenge teńeıtin bolsaq, onyń tunyq bastaýy, qaınar kózi taǵy da Almaty dep aıtýǵa bolady. Bul bizdiń mádenıetimiz ben ádebıetimizdiń ósip-óngen, damýy men qalyptasýyna analyq qushaǵyn ashqan ıgilikti meken boldy» dep shejireli shahar týraly parasatty oı tolǵady.
Aıta keteıik, kórme aldaǵy jyldyń 28 qańtaryna deıin jalǵasady.
