«Búgingi tańda Qazaqstanda erekshe qajettilikteri bar 702 myń adam turady, onyń ishinde jumys isteıtinder – 126 myń adam. Múgedekterdiń quqyqtary týraly Konvensııa qatysýshylardy múgedekterdiń basqalarmen teń dárejede ómir súrý quqyǵyn tıimdi júzege asyrýyn qamtamasyz etý úshin, múgedekterdiń olar úshin jetkilikti ómir súrý deńgeıine quqyqtaryn qamtamasyz etý jáne kótermeleý sharalaryn qabyldaýǵa barlyq qajetti sharalardy qabyldaýǵa mindetteıdi», dedi Janat Omarbekova.
Memlekettik áleýmettik járdemaqylar áleýmettik qorǵaý júıesiniń birinshi (bazalyq) deńgeıin bildiretini atap ótildi. Kórsetilgen járdemaqylarǵa eńbek ótiliniń jáne respýblıkalyq bıýdjetten tólenetin tabysynyń bolýyna qaramastan, belgilengen tártippen múgedek dep tanylǵan barlyq adamdardyń quqyǵy bar.
«Qazaqstan Respýblıkasynda múgedektigi boıynsha jáne asyraýshysynan aırylý jaǵdaıy boıynsha Memlekettik áleýmettik járdemaqylar týraly» Zańǵa sáıkes jalpy aýrýy bar múgedekterge múgedektigi boıynsha aılyq járdemaqylar mynadaı mólsherlerde taǵaıyndalady:
- Birinshi topqa – 65 860 teńge;
- Ekinshi topqa – 52 483 teńge;
- Úshinshi topqa – 35 675 teńge.
Eń tómengi kúnkóris deńgeıiniń ósýine baılanysty olardyń mólsheri jyl saıynǵy ındeksteýdi eskere otyryp, jyl saıyn ınflıasııa deńgeıine 5%-ǵa kóterilýine kepildik beriledi.
«Pandemııa, ekonomıkalyq daǵdarys jáne ınflıasııa áleýmettik mańyzy bar ónimderge, dári-dármekterge baǵanyń ósýine ákeldi jáne bul 5% osy shyǵyndardyń kem degende bir bóligin qamtymaıtynyn moıyndaý kerek. Bul rette jyldyq ınflıasııa 8,9% deńgeıinde saqtalady. Búgingi tańda úshinshi toptaǵy múgedektiń járdemaqysy eń tómengi jalaqy – 42 500 teńgege jetpeıdi. Sonymen qatar qosymsha kirisi joq 500 myńnan astam azamat osy eń tómengi járdemaqyǵa ıe bolýy kerek», dep tolyqtyrdy Janat Omarbekova.
