Mınıstrliktiń qyzmetine qysqasha sholý jasaǵan vedomstvo basshysy lastaný deńgeıi joǵary 10 qaladaǵy atmosferalyq aýanyń jaı-kúıi men ony jaqsartý úshin qabyldanyp jatqan sharalar týraly aıtyp berdi.
Almaty qalasynda 2-shi JEO-da bý-gaz qondyrǵysyn salý jáne 3-shi JEO-ny jańǵyrtý týraly sheshim qabyldandy. «ArselorMıttal Temirtaýmen» kelissózder nátıjesinde kásiporynda qazandyq jáne gaz tazalaý jabdyqtaryn qaıta jańartý júrgiziledi. Bul óz kezeginde 2025 jylǵa deıin atmosferaǵa shyǵaryndylardy 30%-ǵa tómendetýge múmkindik beredi. Sondaı-aq Temirtaý qalasynyń aınalasyna 500 myń túp aǵash otyrǵyzylady. Shyǵys Qazaqstan oblysynda «Qazsınk» AQ jańa qoljetimdi tehnologııalardy paıdalana otyryp, 2025 jylǵa qaraı shyǵaryndylardy 20%-ǵa azaıtady. Mańǵystaý oblysyndaǵy «QazMunaıGaz» UK» munaı ónimderin joıý men kádege jaratýdy bastady. 2,5 mln tonna qaldyqtyń shamamen 1 mln tonnaǵa jýyǵy
(998 myń tonna) joıyldy. Bul jumys tolyqtaı 2024 jyly aıaqtalady.
«Jalpy, ekologııalyq ahýaldy jaqsartý maqsatynda jańa Ekologııalyq kodeks qabyldandy, «Jasyl Qazaqstan» ulttyq jobasy bekitildi, óńirlerdiń ekologııalyq problemalaryn keshendi sheshý jónindegi Jol kartalary bekitildi. Qazirdiń ózinde jumys júrip jatyr. Mınıstrlik pen kásiporyndar arasynda shyǵaryndylardy 20%-dan 30%-ǵa deıin tómendetýdi kózdeıtin memorandýmdarǵa qol qoıyldy», dep atap ótti mınıstr óz baıandamasynda.
Ári qaraı ol sý resýrstary, fermerlik sharýashylyqtardy sýmen qamtamasyz etý, kanaldardy qaıta jańartý jáne sıfrlandyrý, transshekaralyq ózender problemalary men Balqash kóliniń jaǵdaıy, sondaı-aq balyq, orman sharýashylyǵyn damytý jáne janýarlar dúnıesin qorǵaý máseleleri boıynsha atqarylyp jatqan sharalardy tilge tıek etti.
Ulttyq geologııalyq qyzmetti qurý boıynsha S.Brekeshev ken ornynyń, ne basseınniń, ne tutas óńirdiń geologııalyq qurylysy men jer qoınaýynyń jaı-kúıi týraly shynaıy derekterdi kórsetetin model qurý fýnksııalary bar qyzmetti qurý josparlanyp otyrǵanyn aıtty. Bul, saıyp kelgende, qorlardy esepteýge jáne ken ornyn ıgerý jobasyn jasaýǵa múmkindik beredi. Jalpy alǵanda, qyzmet bıýrokratııalyq rásimderdi azaıtyp, geologııalyq aqparattyń halyqaralyq standarttarǵa sáıkes saqtalýyn jáne onyń qoljetimdiligin qamtamasyz etedi.
Suraq-jaýap formatynda mınıstr forýmǵa qatysýshylardyń suraqtaryna da jaýap berdi.
«О́z jumysymyzda biz árqashan «Halyq únine qulaq asatyn memleket» qaǵıdatyn ustanamyz jáne azamattyq qoǵammen dıalog ornatýǵa daıynbyz, óıtkeni qorshaǵan ortany qorǵaý – bárimizdi biriktiretin ortaq is», dep túıindedi óz sózin vedomstvo basshysy onlaın rejiminde ótken kezdesý barysynda.
