Qoǵam • 03 Jeltoqsan, 2021

Tórt túlikti esepke alatyn mobıldi qosymsha ázirlenýde

140 ret kórsetildi

Aýyl sharýashylyǵy mınıstrligi veterınarııa salasyn sıfrlandyrýdy josparlap otyr. Bul týraly vedomstvo basshysy Erbol Qarashókeev málimdedi, dep habarlaıdy Egemen.kz.

Mınıstrdiń aıtýynsha, veterınarııa salasynda kemshilikter az emes. Aýyldarda veterınarııa qyzmeti tıisti deńgeıde damymaı otyr.

«Bul salaǵa sıfrlandyrý áli de bolsa jetpegen, mamandar qaǵazbasty jumystan arylmaǵan. Sonymen qatar ortalyq jáne jergilikti atqarýshy organdardyń veterınarııalyq qyzmetteri arasynda ókilettikterdiń arajigin tolyq ajyratý qajet. Mal dárigerleriniń jalaqysy óte tómen», dedi Qarashókeev senattaǵy úkimet saǵatynda.

Osyǵan baılanysty mınıstr veterınarııalyq qyzmetter naryǵyn damytý, mal dárigerleriniń jalaqysyn kóterip, ortalyq jáne jergilikti atqarýshy organdardyń veterınarııalyq qyzmetteri arasyndaǵy ókilettikterdiń arajigin ajyratýdy josparlap otyr.

Onyń aıtýynsha, ásirese sıfrlandyrýǵa erekshe kóńil bólinip jatyr. Qajetti qarajat bólingen.

«Qazirgi ýaqytta mobıldik qosymshasy bar «Mal derek» baǵdarlamalyq ónimi ázirlenýde. Ol veterınarııalyq qujattamanyń negizgi bóligin sıfrlyq formatqa aýystyryp, mamandardy qaǵazbastylyqtan bosatýǵa jáne janýarlardy esepke alýdyń búkil prosesin avtomattandyrýǵa, epızootııalyq ahýaldy jáne mal ónimderiniń qaýipsizdigin qadaǵalaýǵa múmkindik beredi», dedi Qarashókeev.

 

Sońǵy jańalyqtar

Uqsas jańalyqtar