Eń uly joldyń ózi shaǵyn ǵana qadamnan bastalady. Osydan 15 jyl buryn «Otan» partııasy qurylǵan kezde elimizdiń syndarly kúshteri, naǵyz patrıottar saıası uıymǵa birigip, eldi jańǵyrtýdy, ekonomıkany damytýdy, áleýmettik ádildiktiń saqtalýyn óz jaýapkershiligine aldy. «Otan» RSP Ońtústik Qazaqstan oblystyq fılıaly 1999 jyly 23 naýryzdan bastap jumys isteı bastady. Partııanyń uıymdastyrý jumysyna N. Kabırov, R.Ahmetov, S.Seıtjanov, D.Sherimqulov, J.Máýlenqulov, T.Maqashova, K.Álekeshov, L.Ramanova jáne t.b. belsendi qatysty.
Osy jyldary partııa óziniń qalyptasý jáne damý barysynda kúrdeli jolmen nebir asýlardan ótti. Partııa qoǵam men memleket ómiriniń barlyq salasynda qarqyndy jáne tıimdi damýdy qamtamasyz etýge únemi atsalysyp keldi. О́tken jyldary bizdiń partııa parlamenttik kópshilik bolyp qalyptasty jáne jalpy halyqtyń senimin ıelendi, el birligin bárinen joǵary qoıýdyń naǵyz úlgisin kórsetti.
Qazirgi tańda «Nur Otan» saıası ınstıtýttardyń ishinde kóshbasshy ekeni daýsyz. Halyqtyń úlken senimine ıe partııa búginde bir rettik is-sharalar uıymdastyrýdy emes, elimizdegi saıası, áleýmettik-ekonomıkalyq, ózge de jańǵyrtýlardyń basy-qasynda júrýdi maqsat etedi. Naǵyz atyna zaty saı ekenin sózben emes, ispen dáleldeýde.
Búginde Qazaq elin serpindi damý jolyna bastaý elimizdegi eń qýatty saıası kúsh – «Nur Otanǵa» júktelip otyr. Oǵan partııanyń barlyq resýrstary bar, eń aldymen, árıne, adamı resýrstary. Bizdiń oblysta 85796 adam «Nur Otan» partııasynyń múshesi bolyp tabylady. Olar 310 bastaýysh partııa uıymdaryna toptastyrylǵan. Partııanyń músheleri ekonomıkalyq jáne halyqqa qyzmet kórsetý salalarynda – 9,8, densaýlyq saqtaý salasynda 10,3, bilim berý mekemelerinde 49,8 paıyzdy quraıdy. Oblys turǵyndarynyń 3,2 paıyzy «Nur Otannyń» músheleri.
Partııa qataryna ótkisi keletinder bilim-biligine, qózqarasy men ustanymyna qaraı irikteledi. О́ıtkeni, qazirgi kezde sannan sapa mańyzdy. Oblystaǵy depýtattyq korpýstyń 92 paıyzy «Nur Otan» músheleri. Qoǵamdyq qabyldaý bólmeleri men jemqorlyqpen kúres boıynsha qoǵamdyq keńesteri bar 19 aımaqtyq partııa fılıaldary jumys atqarýda.
Qoǵamdyq qabyldaý – partııanyń basty baǵyttarynyń biri. Osy arqyly tikeleı halyqpen júzdesip, ótinishterin tyńdaımyz, olardyń oń sheshilýine kómektesemiz. Jyl basynan beri oblystyq partııa fılıalynyń qoǵamdyq qabyldaý bólmelerine 920 azamat ótinishpen keldi. Azamattardy tolǵandyratyn máseleler negizinen turǵyn úımen, jumyspen qamtamasyz etý, materıaldyq kómek kórsetý, taǵy basqalar. Kelip túsken aryz-shaǵymdardyń barlyǵy baqylaýǵa alynyp, birqatary oń sheshimin tapty.
Elbasy, partııa Tóraǵasy N.Á.Nazarbaev «Qazaqstan joly-2050: bir maqsat, bir múdde, bir bolashaq» atty Qazaqstan halqyna Joldaýynda elimizdiń aldaǵy damý perspektıvalaryn kezeń-kezeńimen belgilep berdi. Partııamyz elimizdiń jetekshi saıası kúshi retinde óz jumysynda birinshi kezekte Qazaqstannyń árbir aımaǵynda, árbir qalasy men aýylynda ornalasqan jergilikti bastaýysh uıymdaryna arqa súıeıdi. Sondyqtan partııa aldynda búgin jergilikti uıymdardyń qyzmetiniń sapasyn jańa deńgeıge kóterý máselesi tur. Basty nazar óńirlik fılıaldar men jergilikti bastaýysh uıymdarynyń jumysyna aýdarylady.
Búginderi jergilikti partııa uıymdarynyń áleýetin nyǵaıtýǵa baǵyttalǵan birqatar jumystar júzege asyryldy. Sonyń nátıjesinde biz partııa jumysynyń negizgi basymdylyǵy óńirlerge aýysyp jatqanyn anyq kóremiz. О́ńirlerdegi fılıaldardyń materıaldyq negizi aıtarlyqtaı nyǵaıdy, uıymdardyń kadrlyq quramy jańardy, qyzmetkerlerdiń jalaqysy 15 paıyzǵa ósti. Qarajatty únemdeý nátıjesinde óńirlerdi qosymsha qarjylandyrý múmkindigi paıda boldy.
Alǵash ret partııamyzdyń Ortalyq apparaty qyzmetkerleriniń attestasııasy ótti. Endi attestasııalaý óńirlerde de júrgiziletin boldy. Barlyq aımaqtyq fılıaldar ǵımarattarmen, avtokóliktermen qamtamasyz etildi. Partııamyzdyń ınternet keńestigindegi damý strategııasy daıyndalyp, «Elektrondyq partııa» jobasy iske qosyldy. Áleýmettik jelilerdegi partııanyń yqpaly turaqty ósýde, partııanyń jańa sımvolıkasy jurt arasynda keńinen tanystyrylýda.
О́tken kezeńderde kóptegen is-sharalar atqaryldy, al aldymyzda áli kóptegen mindetter tur. Birinshiden, partııamyzdyń jańarý úrdisi ári qaraı jalǵastyrylmaq. Endi partııanyń 2020 jylǵa deıingi baǵdarlamasyn Elbasynyń halyqqa Joldaýyndaǵy, sondaı-aq, saıası Doktrınada belgilengen maqsattarǵa saı sáıkestendirý qajet.
Partııa el Prezıdentiniń basshylyǵyna jáne jańa Saıası Doktrınaǵa súıene otyryp, qazaqstandyqtardyń sapaly ómir men eldiń damýyn qamtamasyz etedi. Osy turǵydan alǵanda, tarıhy tereń, eńbegi eren, qazaqı qaımaǵy buzylmaǵan óńir – Ońtústik Qazaqstan oblysyndaǵy árbir partııa múshesine, azamatyna júktelgen jaýapkershilik zor bolmaq.
Almasbek MAMYTBEKOV,
«Nur Otan» partııasy Ońtústik Qazaqstan oblystyq fılıaly tóraǵasynyń birinshi orynbasary.
Ońtústik Qazaqstan oblysy.
