Myrzahmetov páter, Aımurzaev kólik berdi

Byltyr álemdik jarystarda sozaqtyq eki sportshynyń mereıi ústem boldy. Boksshy Birjan Jaqyptan keıin jastaıynan belbeý kúresiniń qyr-syryn meńgergen taǵy bir sozaqtyq sportshy Dáýren Dámen jastar arasynda álem chempıony atandy. Kúres álippesin aýdandyq balalar men jasóspirimder sport mektebinen bastaǵan ol búginde el namysyn qorǵaıtyn saqa sportshyǵa aınalǵany aıdan anyq. Aty báıgeden ozyp kelse, tórge ozdyryp qurmet kórsetetin kórgendi eldiń urpaǵy emespiz be?! Sozaqtyń abyroıyn asyryp, kúlli qazaqtyń dańqyn aspandatqan osynaý sportshylarǵa, atap aıtqanda, boksshy Birjan Jaqyp, bokstan ulttyq quramanyń bas bapkeri Myrzaǵalı Aıtjanov, belbeý kúresinen álem chempıony Dáýren Dámen, jergilikti jattyqtyrýshy Samat Sarmantaevqa aýdan ákimi Amanǵalı Aımurzaev qurmet kórsetti. «О́tken jyly eki birdeı jerlesimiz álem chempıony atandy. Toǵyz sportshymyz kúresten sport sheberi ataǵyn qorǵady. Dástúrli túrde ótetin «Dala men qala» fýtbol jarysynda júldeli orynnan kórindik. Munyń bári árıne, aýdan sportynyń durys baǵytta damyp kele jatqanyn baıqatady» degen aýdan ákimi Birjan Jaqypqa sý jańa kóliktiń kiltin tabys etti. Sondaı-aq, Sozaq sportynyń damýyna ólsheýsiz úles qosyp júrgen boks bapkeri Samat Sarmantaevqa qyzmettik úıdiń kiltin ustatsa, Dáýren Dámen men Myrzaǵalı Aıtjanovqa qarjylaı sııapat kórsetti. Sporty bıik eldiń, rýhy berik. О́skeleń urpaq ta aldyńǵy tolqynǵa qarap boı túzeıdi. Endeshe, jeńisti joldar jalǵasyn taba bersin. Erlan RAIYMQULOV. Ońtústik Qazaqstan oblysy.