Toqaev: Jastardyń tyń ıdeıalary halyqtyń ıgiligine aınalady

– Elimiz derbes memleket bolǵannan beri oıy erkin, rýhy azat tutas býyn ósip jetildi. Táýelsizdik perzentteriniń aldyńǵy tolqyny erjetip, el isine aralasýda. Olar otanymyzdyń ósip-órkendeýine óz úlesin qosyp kele jatyr. Men egemendik kezeńinde týyp-ósken jastarymyzǵa arnaıy grant bólýdi tapsyrǵanmyn. Bul – talapty ul-qyzdarymyzdyń bastamalaryn qoldaý úshin jasalǵan qadam. Qazaqta «Jas kelse – iske» degen jaqsy sóz bar. Halqymyz jastarǵa árdaıym zor senim artyp, erekshe úmit kútedi. Urpaqtyń tárbıeli, bilimdi jáne  bilikti bolýyna aıryqsha den qoıady, – dedi Memleket basshysy.

Qasym-Jomart Toqaev daryndy jastarymyz elimizdiń bolashaǵyna degen senimdi nyǵaıta túsetinin, olardyń týǵan el úshin qyzmet etýge qulshynysy qýantatynyn aıtty.

– Men grant jeńimpazdary usynǵan jobalarmen tanysyp shyqtym. Bul jobalardyń kópshiliginde ekologııaǵa basa mán berilgenin baıqadym. Bul – óte durys. О́ıtkeni, qorshaǵan ortany qorǵaý – qazir barsha adamzat úshin asa mańyzdy másele. Keń baıtaq jerimizdiń biregeı tabıǵatyn saqtaý – bárimizdiń qasıetti boryshymyz. Jastardyń tyń ıdeıalary naqty júzege asyp, halyqtyń ıgiligine aınalady dep senemin. Shyn máninde, bul elimizdiń mereıtoıyna Táýelsizdik urpaqtarynyń tartýy bolmaq, – dedi Memleket basshysy. 

Prezıdent jastardy qoldaý memlekettik saıasattyń negizgi baǵyty ekenine toqtaldy. Qasym-Jomart Toqaev ótken ǵasyrdyń 90-shy jyldaryndaǵy daǵdarys kezinde «Bolashaq» atty aýqymdy bilim baǵdarlamasynyń júzege asyrylǵanyn jáne onyń Tuńǵysh Prezıdentimiz Nursultan Ábishuly Nazarbaevtyń bastamasy ekenin atap ótti.

– Sonyń arqasynda álemniń úzdik joǵary oqý oryndarynda elimiz boıynsha myńdaǵan jas bilim aldy jáne áli de oqyp jatyr. Olardyń kóbi Qazaqstannyń qarqyndy damýyna zor úles qosyp keledi. Prezıdenttik jastar kadrlyq rezervi tıimdi áleýmettik lıftke aınaldy. Bul bastama jastardyń, órshil kásibı mamandardyń memlekettik basqarý júıesinde ózin taǵy bir márte dáleldeýine múmkindik beredi, – dedi Qasym-Jomart Toqaev.

Sonymen qatar partııalardyń saılaý tizimindegi 30 paıyzdyq kvota Májilis pen máslıhattarda jastar qatarynyń kóbeıýine yqpal etkenin aıtty. Prezıdent jastardy áleýmettik turǵydan qoldaıtyn jobalar men baǵdarlamalardyń júzege asyrylyp jatqanyna toqtaldy.

– Jastardy qoldaý úshin turǵyn-úı baǵdarlamalary jáne arnaıy jobalar júzege asyrylýda. Mádenıet, ǵylym men bilim salasynda tabysqa jetken daryndy jastarǵa memlekettik syılyq berilýde. Búgingi is-shara sizderdiń bastamalaryńyzdy jáne shyǵarmashylyq josparlaryńyzdy júzege asyrýǵa tyń serpin beretinine kámil senemin, – dedi Memleket basshysy.

Qasym-Jomart Toqaev qazirgi ýaqytta tabysty adam bilimdi, eńbekqor bolý, maqsatqa umtylý jáne belsendilik tanytý sııaqty qasıetterimen ǵana erekshelenetinin atap ótti. Qasym-Jomart Toqaev grant jeńimpazdaryna jobalaryn iske asyrýǵa jaqsy múmkindik berilip otyrǵanyn aıtty.

– Qazaqta «Talaptyǵa jol ber» degen naqyl sóz bar. Memleket jastardyń talabyn ushtaýǵa barynsha jaǵdaı jasap kele jatyr. Atqarylyp jatqan aýqymdy jumystyń, reformalardyń ıgiligin sizder mindetti túrde kóresizder. Jaqynda Elbasy jastarǵa tereń maǵynaly úndeýin joldady. О́skeleń urpaq aǵa býynnyń úmitin aqtaıtyny sózsiz. Sol úshin árbir jas boıyna tek jaqsy qasıetterdi sińirýi kerek, – dedi Prezıdent.

Jıyn sońynda Memleket basshysy jasampaz, otanshyl ári ultjandy jastar ǵana elimizdi órkendete alatynyn aıtyp, jastardyń bolashaqta kásibı maman, óz isiniń naǵyz maıtalmany bolatynyna, sol arqyly aǵa býynnan asyp túsetinine senim bildirdi.

Jastar óz kezeginde memlekettiń qoldaýy úshin Prezıdentke alǵys aıtty.