Ústimizdegi jyly «Kedergisiz keleshek» jobasy sheńberinde
múgedekterge arnalǵan 5 myń jumys orny qurylady
«Nur Otan» partııasynyń 15 jyldyǵy kúni ótken Respýblıkalyq qoǵamdyq qabyldaýda Memleket basshysynyń «Qazaqstan joly – 2050: bir maqsat, bir múdde, bir bolashaq» halyqqa Joldaýyndaǵy berilgen tapsyrmalardy oryndaý maqsatynda múmkindigi shekteýli jandarǵa áleýmettik qoldaý kórsetý máselesine arnalǵan selektorlyq keńes ótti. «Nur Otan» partııasynyń «Kedergisiz keleshek» jobasy múmkindigi shekteýli jandardyń ómir sapasyn arttyrýǵa baǵyttalyp otyr. Atalǵan jobany tórt baǵyt boıynsha júzege asyrý josparlanǵan: múgedekterdi turaqty eńbek ornyna jumysqa turǵyzý; múmkindigi shekteýli adamdarǵa jaǵdaı jasaý; qoǵam men bıznestiń nazaryn múgedekterdiń máselesine aýdarýǵa baǵyttalǵan turǵyndardy aqparattandyrý jumysyn kúsheıtý; múgedekterdiń quqyǵyn tıimdi júzege asyratyn quqyqtyq alań qurý.
Joba sheńberinde 2014 jyldyń sońyna deıin 5 myń múgedekti jumysqa ornalastyrý qarastyrylǵan. Onyń syrtynda, Eńbek jáne halyqty áleýmettik qorǵaý mınıstrligi men ákimdikterdiń aqparatyna sáıkes, ústimizdegi jyly 5 myń múgedekti jumysqa turǵyzatyn eńbek orny qurylady.
«Kedergisiz keleshek» jobasy iske qosylǵan birinshi aıda 1300 múgedekke jumys tabyldy. Mysaly, taıaýda ǵana Taraz ben Pavlodar qalasynda ótken bos oryndardyń jármeńkesinde múmkindigi shekteýli 600 adam jumyspen qamtamasyz etildi. Jalpy, ústimizdegi jyly elimizdiń barlyq aımaqtarynda múgedekterge arnalǵan 440-qa jýyq bos oryndardyń jármeńkesi ótedi. Olardyń negizinde «Nur Otannyń» alǵashqy partııalyq uıymdary qurylǵan mekemelerde 14,5 myńǵa jýyq múgedek eńbek etedi. Ondaǵy múgedekterdiń sanyn belgilengen 3% kvotaǵa deıin jetkizý josparlanyp otyr.
Búgingi tańda áleýmettik jáne kólik ınfraqurylym nysandarynyń 83%-ǵa (15,5 myń) jýyǵy múgedekterge qoljetimdi emes. «Nur Otan» partııasynyń aımaqtyq fılıaldary ol jaqtaǵy nysandardy qujattaý men beıimdeý monıtorıngi jumysyn bastap ketti.
Qazaqstanda 630 myńǵa jýyq múgedek ómir súredi. Búgingi tańda jumys isteı alatyn jastaǵy 405 myń múgedektiń 20%-dan astamy (83 myń adam) jumysqa ornalasqan. Solaı bola tura, 17 myń múgedektiń jumys isteı alatyn qabileti bar.
«Egemen-aqparat».
