Ushaq bıletteri qymbattady

Túrkistan oblysynda ushaq bıletteriniń quny sońǵy bir jyl kóleminde 30 paıyzǵa qymbattasa, Qyzylorda oblysynda 22,9, al Mańǵystaý oblysynda 19,4 paıyzǵa ósken. Eldegi 17 óńirdiń ishinde tek Soltústik Qazaqstan oblysynda ǵana baǵa byltyrǵy qazan aıyndaǵy kórsetkishimen qalǵan. Sonymen qatar Pavlodar (12,7 paıyz), Batys Qazaqstan (15,3 paıyz) jáne Aqmola oblystarynda (22,5 paıyz) da baǵa tómendeýi baıqalady.

Bul rette qańtar-qyrkúıek aralyǵynda áýe kom­pa­nııa­larynyń tabysy 265,7 mlrd teńgege jetip, byltyrǵy kórsetkishten eki ese asyp túsken. Tabystyń negizgi bóligi – 252,6 mlrd teńge jolaýshylar tasymalynan tússe, qalǵan 13,1 mlrd teńge júk tasymaldaryn tasý nátıjesinde túsken. Salystyra aıtar bolsaq, 2020 jyldyń úsh toqsanynda áýe kompanııalarynyń tabysy 135,8 mlrd teńgeni quraǵan. Bul 2019 jyldyń úsh toqsanyndaǵy tabys­tan eki ese az. Árıne buǵan COVID-19 pandemııasyna baılanysty týyndaǵan túrli shekteý sharalary, shekaralardyń jabylýy áser etkeni sózsiz. Áýe kompanııalarynyń tabysy sharyqtaı ósken ýaqyt retinde Finprom 2016 jáne 2019 jyldardy aıryqsha bólip ataıdy.

«2021 jyldyń toǵyz aıynda áýe kompanııalary 6,9 mln adamdy tasymaldaǵan. Bul bir jyl burynǵydan 81,5 paıyzǵa joǵary kórsetkish. «Koronadaǵdarysqa» deıingi 2019 jylmen salystyrǵanda bıyl jolaýshylar tasymaly 8,1 paıyzǵa ósti. Eske salaıyq, 2020 jyldyń toǵyz aıynda jolaýshylar tasymaly 40,4 paıyzǵa quldyrap, nebári 3,8 mln adamdy quraǵan edi», dep jazady portal.

Bıyl qańtar-qyrkúıek arasynda áýe kompanııalary 25 myń tonna júk pen bagaj tasymaldaǵan. Bul da byltyrǵy derekten 61,8 paıyzǵa kóp. Azamattyq avıasııa komıtetiniń málimetinshe, 2020 jyly áýe kompanııalarynyń shyǵyny 350 mlrd teńge bolǵan. Qazir ishki reısterdiń barlyǵy derlik tolyqtaı qalpyna keldi, sondyqtan jolaýshylar tasymaly da kún sanap ósip jatyr.

«Qazir «Qýatty óńirler – el damýynyń draıveri» atty ulttyq joba jasalyp jatyr. Ol boıynsha bes áýejaı (Qostanaı, Oral, Qyzylorda, Shymkent, Almaty) modernızasııadan ótedi. Sondaı-aq 8 aerodromdaǵy áýe lınııasy ınfraqurylymyn qalpyna keltirý josparlanǵan», dep jazady Finprom.

2020 jyldyń qorytyndysy boıynsha ishki áýe tasymaly boıynsha Air Astana kósh bastaǵan. Olarǵa ishki áýe tasymalynyń 70 paıyzy tıesili. Sonyń ishinde 31 paıyzy FlyArystan-nyń enshisinde. Ekinshi jáne úshinshi oryndardy 24 jáne 4 paıyzben SCAT Airlines pen Qazaq Air bólisedi. Sonymen qatar «Iýjnoe nebo» 2 paıyzdyq kórsetkishke ıe. Halyqaralyq áýe tasymaly boıynsha da Air Astana-nyń bási joǵary – 46 paıyz. SCAT Airlines 16 paıyzdy alsa, «Aeroflot» 9 paıyz deńgeıinde jolaýshylardy shekara asyrady. Úzdik bestik qataryna Turkish Airlines (7 paıyz) jáne Flydubai (5 paıyz) kompanııalary da kiredi.

2020 jyly Air Astana-nyń tabysy 400,3 mln dollarǵa jetken. Áýe kompanııasynyń quramynda ortasha jasy 5,1 jyldy quraıtyn 34 áýe kemesi bar.