Ústimizdegi jyly qazaqtyń halyq kompozıtory, dala sırkiniń negizin qalaýshy, ulttyq at sportynyń túrli tásilin jańǵyrtýshy ónerpaz, jaýyryny jerge tımegen alyp kúsh atasy Balýan Sholaq (shyn aty Nurmaǵambet) Baımyrzaulynyń dúnıege kelgenine 150 jyl tolady.
Balýan Sholaq – zamanynda qazaq án óneriniń tamasha oryndaýshysy, nasıhatshysy bola júrip, ózi de án shyǵaryp, qazaqtyń tól ónerin órkendetýge úlken úles qosqan sazger. Ult maqtanyshynyń jıyrmaǵa jýyq áni bolǵanymen, búgingi kúnde onyń halyq arasyndaǵy nasıhaty kóńil kónshite bermeıdi. Aqyndyq qyry múlde zerttelmegen.
Tipti, Balýan Sholaqtyń ómirbaıany jónindegi zertteýler áli kúnge naqtylanbaǵan. Árkim óz degenimen júr. Qazaq rýhanııaty ǵana emes, mádenıetiniń de qalyptasýynda zor orny bar tulǵanyń dúnıege kelgen jeri men qaıtys bolǵan jylyna qatysty derekterdi de ártúrli aıtyp júrmiz.
Sondaı-aq, ardaqty azamattyń óz ulty úshin jasaǵan kúreskerlik qajyr-qaıratyn qazirgi urpaqtyń bile bermeıtini qynjyltady. Tipti, bolmysy bólek, tulǵasy eren ult aıbynynyń ult-azattyq kóterilisindegi orny da anyqtalmaǵan. Kórnekti qalamger Sábıt Muqanovtyń «Balýan Sholaq» povesinde jáne belgili jazýshy, dramatýrg Dýlat Isabekovtiń «Jaýjúrek» týyndysynda aıtylǵan baılamdar jetkiliksiz dep esepteımiz. Sondyqtan, áli de ashylmaǵan qyrlary kóp dańqty balýan, ánshi, aqyn, halyq kompozıtory Balýan Sholaqtyń 150 jyldyǵynda osyndaı olqylyqtardyń orny shamalap bolsa da tolyqtyrylar degen úmitimiz bar. Ult tarıhynda qaıtalanbas qadirlimizdiń ómirbaıanyn, shyǵarmashylyǵyn tolyq zerttep, laıyqty baǵasyn bersek, Elbasynyń halyqqa arnaǵan Joldaýynda kórsetilgen jańa qazaqstandyq patrıotızmdi qalyptastyrý men damytý isine qosqan úlken úlesimiz bolar edi.
Sondyqtan Úkimettiń 1999 jylǵy 28 qyrkúıektegi «Mereıtoılar men ataýly kúnderdi merekeleý týraly» qaýlysyna sáıkes Balýan Sholaq (Nurmaǵambet) Baımyrzaulynyń 150 jyldyǵyna oraı bılik oryndarynan tómendegi is-sharalardyń oryndalýyna yqpal etýdi suraımyz.
Birinshi – Almaty qalasyndaǵy Balýan Sholaq sport jáne mádenıet saraıynyń aldyna Alash arysynyń eskertkishin ornatý. Ekinshi – Aqmola men Jambyl oblystarynda Balýan Sholaqtyń mereıtoıyna oraı is-sharalar ótkizý. Úshinshi – Astana nemese Almaty qalalarynda tuǵyry bıik tulǵanyń ómiri men shyǵarmashylyǵyna arnalǵan ǵylymı-tájirıbelik konferensııa uıymdastyrý. Tórtinshi – ataqty baba týraly kórkem jáne derekti fılm túsirip, respýblıkalyq telearnalardan kórsetý.
Eli erine osyndaı ıgilikti ister atqarsa, abyroıy asady, mártebesi kóteriledi.
Qojahan Jabaǵıev,
Parlament Májilisiniń depýtaty.
