Aıy týyp, juldyz,
Kúni janǵan EL,
Ata-babam máńgi ańsaǵan arman EL.
Máńgi tiri, máńgi Azatsyń, qazaǵym,
Mundaı uly monýmentti salǵan EL.
Uly óner aldyna kep bas urdyq,
Osyndaıdan kórinedi asyldyq.
Alataýdyń moınyna ákep ilgendeı
Azattyqtyń boıtumaryn ǵasyrlyq!
Kúnim keldi aqynyń bop tolǵaıtyn,
Sezim keshtim ómirbaqı bolmaıtyn.
Qoramsaqqa qoldy salsań – úsh jebe
Qazaǵymnyń tutastyǵyn qorǵaıtyn.
Jan-jaǵynan jaqsylary qalyspaı,
Han bolǵan soń Azamatym arystaı.
Altyn Adam — ata-babam kózi bul,
Kanattanyp jaýǵa shapqan barystaı.
Keler Kúnge samǵaýyma — jyr qanat,
Eskertkishti kórseń kóziń nurlanad.
Men sııaqty Alataýym tolǵanyp,
Eskertkishke tebirenip tur qarap!
Taýym, Dala, Teńizim de tolǵatyp,
Bir ónerin bolashaqqa joldatyp,
Qazaq ózi baq-birligin pash etti,
Mundaı Uly eskertkishti ornatyp.
Táýelsizdik jol bastaldy, Táýekel,
Quldyq degen Adamzattyń jaýy eken.
Táýelsizdik Eskertkishi aldynda,
Jańa týǵan nemeremdi táý etem!
Qaqtym qazyq qosyl bálkim, qosylma,
Qyzǵanatyn dushpanyń da, dosyń da,
Ǵasyrlardyń kózi kelip túıisti,
Eskertkishtiń qudireti osynda!
Baýyrlarsha qushaqtasyp súıisip,
Keldik birge qanymyzdy quıysyp.
Keler urpaq qarar bálkim dál bizdeı,
Eskertkishte janarymyz túıisip.
Jetti Kúnim, jetti qanat taldyryp,
Ǵasyrlarǵa daýsym jeter jańǵyryp.
Táýelsizdik eskertkishke ant etem,
Men – Qazaqpyn! Men Azatpyn máńgilik!
Kýanǵannan kúlermiz de, jylarmyz,
Tip-tik ushyp jete almaıtyn shyǵar qus.
O, Táńirim, bir ózińe bas ıem,
Qazaq bolyp týǵanyma myń alǵys!
Keleshekke qus bop qanat qaqty Adam,
Uly ónerdiń máńgi otyn jaqty Adam!
Táýelsizdik monýmenti aldynda,
Qazaq bolyp týǵanyma maqtanam!
Shómishbaı SARIEV
1996 jyl
