Kınotýyndyny QR Mádenıet jáne sport mınıstrliginiń tapsyrysy boıynsha «Qazaqfılm» kınostýdııasy «Stalker Sınema» kompanııasymen birlesip túsirgen.
«Kúnbaǵys» — «orta jas» daǵdarysyna ushyraǵan otbasy týraly dramaǵa toly hıkaıa. Ishki qaıshylyqtarymen áýre bolǵan ata-anasynyń qaraýsyz qalǵan jasóspirim bala úıde de, mektepte de «býllıngtiń» barlyq sumdyqtaryn bastan keship, óz qıyndyǵymen betpe-bet qalǵan kereksiz adamǵa aınalady. Pana izdegen Ámir qumar oıyndarǵa táýeldilikke ákeletin kompıýterlik oıyndar álemine enedi...
Mádenı is-shara barysynda sóz sóılegen fılmniń qoıýshy rejısseri Elıa Gılman tusaýkeserge kelgen kórermenderge alǵysyn aıta otyryp, kartınanyń kınofestıvalderdegi jetistikterimen bólisip, kınotýyndynyń túsirý tobyna júldelerin tabystady.
Osylaısha rejısser Istanbul Film Awards jáne Cannes Film Awards kınofestıvalderinde marapattalǵan «Úzdik akter» juldesin fılmde basty rólderdiń birin somdaǵan akter Erkebulan Daıyrovqa tabystady. Sondaı-aq, basqa da júldelerdi fılmniń jas akteri Rashıd Mýsın, ssenarıı avtory Rasýl Shybyntaı, operator Alekseı Kırıýhın, qoıýshy sýretshi Oksana Azamatova, prodıýserler Gúlsına Mýstafına men Aleksandr Gılman aldy.
Aıta ketsek, jalpy alǵanda osy kúnge deıin «Kúnbaǵys» dramasy 27 halyqaralyq kınofestıvalde túrli nomınasııalar boıynsha 47 syılyqty qanjyǵasyna baılady.
Fılmde basty rólderdi somdaǵan reseılik akter Kırıll Kıaro jáne serbııalyq aktrısa Sloboda Mıchalovıch atalǵan is-sharaǵa qatysa almaǵandyqtan, beınejazba arqyly áriptesterin tusaýkesermen quttyqtap, sáttilik tiledi.
Kórsetilimniń aldynda rejısser Elıa Gılman bul fılmdi túsirýge dostarynyń otbasynda oryn alǵan qaıǵyly jaǵdaıdyń túrtki bolǵanyn aıtty.
– Dostarymyz uldarynan aıyrylyp qaldy. Bul jaǵdaı maǵan óte aýyr tıdi, nátıjesinde osy fılm dúnıege keldi. Bul oqıǵa – meniń barlyq ata-analarǵa joldaýym, men sııaqty óz balalaryn tárbıelep otyrǵan búkil álemdegi analar men ákeler meni túsinedi dep úmittenemin. Jasóspirim bolý, erejelerdiń qysymyna qarsy turý qıyn. Biz balalarymyzǵa jaqyn bolýymyz kerek jáne olardy jaqsy kórý úshin qoldan kelgenniń bárin jasaýymyz kerek, - dedi rejısser Elıa Gılman.
Sondaı-aq rejısser «Kúnbaǵys» fılmi keler jyly sáýir aıynda prokatqa shyǵatynyn habarlady.
Qazirgi tańda «Kúnbaǵys» fılmi ıelengen marapattardyń tolyq tizimi tómendegideı:
«Úzdik tolyqmetrli fılm» syılyǵy - New York Cinema Independent Awards, Toronto International Woman Film Festival, Crown Wood International Film Festival (Úndistan), Rome Movie Awards, Milan Gold Awards, KIFF (Kotka International Film Festival, Finland), MosfılmFest (Máskeý, Reseı), SLATE International Film Festival (Gonkong, Qytaı)
«Úzdik rejısser» syılyǵy - Venice Film Awards, Crown Wood International Film Festival (Úndistan), Paris International Film Festival, Tokyo International Monthly Film Festival, Milan Gold Awards, Hollywood Gold Awards
«Úzdik áıel-rejısser» - Cannes World Film Festival, Istanbul Film Awards, New York Cinema Independent Awards, Crown Wood International Film Festival (Úndistan)
«Úzdik sheteldik fılm» syılyǵy - Cannes World Film Festival, Istanbul Film Awards
«Úzdik drama» syılyǵy - Red Movie Awards (Fransııa), Istanbul Film Awards, Prague Film Awards
«Orys tilindegi úzdik fılm» syılyǵy - Near Nazareth Film Festival (Izraıl)
«Úzdik akter» syılyǵy - Istanbul Film Awards (Erkebulan Daıyrov, Sloboda Mıchalovıch, Rashıd Mýsın), Milan Gold Awards (Sloboda Mıchalovıch), Hollywood Gold Awards (Sloboda Mıchalovıch)
«Úzdik jas akter» syılyǵy - Cannes World Film Festival (Rashıd Mýsın)
«Azııanyń úzdik akteri» - Cannes Film Awards (Erkebulan Daıyrov)
«Úzdik operator» syılyǵy - Istanbul Film Awards (Alekseı Kırıýhın)
«Úzdik ssenarıı» syılyǵy - Hollywood Gold Awards (Rasýl Shybyntaı)
«Úzdik qoıýshy-sýretshi» syılyǵy - Paris International Film Awards, London International Monthly Film Festival, Hollywood Gold Awards (Oksana Azamatova)
«Úzdik prodıýser» syılyǵy – Beijing Film Festival (China), Hollywood Gold Awards (Gúlsına Mustafına, Aleksandr Gılman)
«Úzdik kompozıtor» syılyǵy - LA Independent Film Awards
«Sheberligi úshin» syılyǵy - WRPN Women’s International Film Festival
Qazylar alqasynyń arnaıy júldesi - White Nights Film Festival (Sankt-Peterbor)
«Erekshe atalym» syılyǵy - Paris Film Festival, LA Independent Film Awards
