Ortalyq kommýnıkasııalar qyzmeti alańynda ótken brıfıngte mınıstr bul kórsetkishke jekelegen qyzmet baǵyttary boıynsha qolǵa alynǵan aldyn alý jáne profılaktıkalyq is-sharalardyń arqasynda qol jetkizilgenin aıtty. «Bólimshe qyzmetkerleri 11 myńnan astam adamdy qutqarsa, 12 myńǵa jýyq turǵyn evakýasııalandy, 4 myńnan astam azamatqa alǵashqy medısınalyq kómek kórsetildi. Jyl basynan beri tótenshelikter 76 myńnan astam shaqyrtýǵa shyqqan», degen vedomstvo basshysy bıyl tótenshe oqıǵalardyń kesirinen zardap shekkenderdiń sany 1736-ǵa, al qaza tapqandardyń qaraly tizimi 838-ke jetkenin de habarlady. Túrli apat kezindegi materıaldyq zalaldyń óskeni de baıqalady. Sońǵy 11 aıda 354 adam qyzyl jalynnyń qurbanyna aınalsa, 400-den astam turǵyn sýǵa ketken. Al óndiristik apattan 13 adam kóz jumǵan.
«О́kinishke qaraı, bıyl 2 nemese odan da kóp adamnyń ólimi tym jıilep ketti. Qoǵamdyq rezonans týdyrǵan bul qaıǵyly oqıǵalar jalpy statıstıkaǵa áser etpeı qoımady. Jyl basynan beri eki ret gaz ballondarynyń jarylysy tirkeldi. Nur-Sultan jáne Petropavl qalalarynda bolǵan osy apat saldarynan 4 adam qaza taýyp, 15-ten astam turǵyn zardap shekti. Keıinnen Aqmola oblysynyń Shortandy aýdanynda 6 adam, onyń ishinde úsh bala dál osyndaı jarylystan kóz jumdy. Sondaı-aq Jambyl oblysyndaǵy áskerı qoımadan órt shyǵyp, 17 adam qaza tapty», degen mınıstr qaraly oqıǵalardy tizbelep shyqty.
Brıfıng barysynda Iý.Ilın sondaı-aq sel júrý qaýpi bar kezeńde 1800-ge jýyq qaýipti ýchaskede jerústi jáne aerovızýaldi tekserý júrgizilgenin de aıtyp ótti. «Jyl saıyn elimizdiń taýly aımaqtarynda muzdyqtardyń tez erýi jańa muzdaq kólderdiń paıda bolýyna ákep soǵady. Kóbinese olar óte qaýipti bolyp tabylady jáne sel men kóshkin qubylystaryna qaýip tóndiredi», dedi bul jóninde ol.
Qaýipti ýchaskelerdi baqylaýdy selden qorǵaýdyń jańa tehnologııalaryn qoldana otyryp, «Qazseldenqorǵaý» arnaıy baqylaý jáne qulaqtandyrý qyzmeti júzege asyrady. Olar halyqty habardar etý boıynsha jańa tehnologııalardy engizýde. «Almaty, Jambyl, Shyǵys Qazaqstan, Túrkistan oblystary men Almaty qalasy – sel men kóshkin qaýpine jıi ushyraıtyn óńirler. Qazirgi tańda Qorǵas, Kishi jáne Úlken Almaty, Aqsaı, Qarǵaly ózenderiniń basseınderinde avtomatty monıtorıng júıesiniń 31 stansasy jumys isteıdi. Olar jaǵdaıdy baǵalaýǵa jáne sel oshaqtaryna jedel den qoıýǵa múmkindik beredi. Almaty qalasy, Almaty oblysy jáne «Qorǵas» shekara mańyndaǵy halyqty qorǵaý jáne selderden keletin zalaldy barynsha azaıtý úshin Aqsaı, Aıýsaı, Qorǵas ózenderinde selden qorǵaý bógetteri men qorǵanysh qurylystaryn salý júrgizilýde», dep atap ótti vedomstvo basshysy. Al Almatyda jer silkinisin erte habarlaıtyn 9 avtomattandyrylǵan seısmostansa ornatylǵan. Mundaǵy qurylǵylar magnıtýdasy 4 ball jáne odan joǵary jer silkinisin erte habarlaı alady. Jalpy, elimiz boıynsha seısmıkalyq qaýipti jáne jer silkinisterin boljaý qaýpin tómendetý maqsatynda seısmıkalyq qaýipti aımaqtarda 63 stasıonarlyq stansa jumys isteıdi. Mınıstrdiń aıtýynsha, aldaǵy ýaqytta taǵy 28 stansa ornatý josparda bar.
