Elbasy maqalasynda aıtylǵan meıirbandyq, danalyq jáne ónegelilik jónindegi tereń maǵynaly sózder eń aldymen Táýelsizdik qurdastaryna arnalǵandaı.
Tuńǵysh Prezıdentimiz jastardy táýelsizdigimizdi qasterlep, ony basty qazynamyz retinde saqtaýǵa jáne qadirleýge shaqyrdy. Sonymen qatar, egemendik elin, jerin naızasynyń ushymen, bileginiń kúshimen qorǵaǵan Qabanbaı, Bógenbaı, Naýryzbaı, Raıymbek syndy batyrlardyń, Áıteke, Tóle, Qazybek bıler sııaqty dana babalardyń eren erligimen kelgenin jas urpaqtyń esine saldy.
HH ǵasyrda ata-babalarymyz ult-azattyq kóterilisterde, azamat soǵysynda qanǵa bókti, ashtyqty, qýǵyn-súrgindi, Keńes Odaǵyn fashızmnen qaharmandyqpen qorǵaýdy basynan keshirdi. Qazaq halqy eren eńbegi men tastaı berik tózimdiliginiń arqasynda aman qaldy.
Maqalada óskeleń urpaq búgingi kúnniń syn-qaterleri men talaptaryna sáıkes bolýy úshin tarıhymyzdy tereń bilýi kerektigine erekshe nazar aýdarylǵan.
Táýelsiz Qazaqstannyń Tuńǵysh Prezıdenti Nursultan Nazarbaev elimizdi beıbitshilik jolyna salyp, yntymaq pen birlikti tý etip kóterip keledi. Osydan bolar, bizdiń elimizde jalǵan abyroıǵa umtylý, basqa etnos ókilderin qyspaqqa alý nemese kúshtep shyǵarý kórinisteri eshqashan bolǵan emes.
Taıaýda ótken Konfessııaaralyq jáne órkenıetaralyq suhbat ortalyǵy uıymdastyrǵan konferensııaǵa qatystym. Osy forýmda pravoslavıe epıskopy Gennadıı kelesini málimdedi. Qazaqstanda 1991 jyly 91 pravoslavıe shirkeýi bolsa, qazirgi tańda olardyń sany 312-ni quraıdy. Sonymen qatar jaqyn arada Almaty qalasynda 30-ynshy pravoslavıe ǵıbadathanasy ashyldy, al 30 jyl buryn munda úsheýi ǵana bolǵan.
Qazaq halqy táýelsizdik alǵannan keıin de kommýnıstik qýǵyn-súrgin zamanyndaǵy tutas halyqtarǵa jáne dinderge kórsetilgen qonaqjaılylyq pen aqkóńildilik qasıetin kórsetýdi jalǵastyryp, óziniń tarıhyna «qurbandyq pen meıirimdiliktiń altyn betterin jazdy», dedi epıskop Gennadıı.
Elbasynyń kóregen saıasatynyń arqasynda bizdiń elimizde etnosaralyq jáne dinıaralyq qaqtyǵystar oryn almady.
Qazaqstan memleketiniń taǵy bir mańyzdy faktory – onyń kópvektorly syrtqy saıasaty. Dıplomatııalyq qyzmettiń barlyq baspaldaqtarynan ótken dıplomat retinde men Elbasy qurǵan syrtqy saıasatyna erekshe toqtalǵym keledi.
Jaqynda Memleket basshysy Qasym-Jomart Toqaev Syrtqy ister mınıstrliginiń keńeıtilgen alqa otyrysynda atap ótkendeı, Qazaqstan tarıhı qysqa merzim ishinde tek tanymal memleketke ǵana emes, sondaı-aq óńirlik jáne jahandyq úderisteriniń belsendi qatysýshysyna aınaldy.
Elbasynyń tikeleı basshylyǵymen kásibı dıplomatııalyq qyzmet qalyptasty. Iаdrolyq qarýdan erikti túrde bas tartý, Qazaqstan Respýblıkasynyń memlekettik shekarasyn zańdy túrde resimdeý, Kaspıı teńiziniń quqyqtyq mártebesi týraly konvensııaǵa qol qoıý sııaqty aýqymdy syrtqy saıası máseleler sheshildi.
Bizdiń strategııalyq seriktesterimiz – Reseı, Qytaı jáne Ortalyq Azııa elderimen, sonymen qatar jetekshi ınvestısııalyq, saýda jáne tehnologııalyq seriktesterimiz – AQSh, Japonııa, Koreıa jáne Eýropalyq odaq elderimen berik qarym-qatynastarymyzdy da atap ótý qajet.
Elbasynyń dıplomatııasy kóptegen, sonyń ishinde eń kúrdeli halyqaralyq máseleler boıynsha ymyraly sheshimderdi izdestirýge baǵyttalýymen tanymal. Sheteldik dıplomattar Qazaqstannyń batyl halyqaralyq bastamalar kóterip qana qoımaı, olardy tabandy ári tabysty júzege asyryp kele jatqanyn biledi. Mysaly, Azııadaǵy ózara is-qımyl jáne senim sharalary jónindegi keńes pen Álemdik jáne dástúrli dinder lıderleri seziniń shaqyrylýy, Islam yntymaqtastyǵy uıymy men Túrki memleketteri uıymynyń búgingi formatyna ózgerýi, Eýrazııalyq ekonomıkalyq odaq, Shanhaı yntymaqtastyq uıymy jáne Azyq-túlik qaýipsizdigi jónindegi Islam uıymynyń qurylýy, Eýropadaǵy qaýipsizdik jáne yntymaqtastyq uıymyna Qazaqstannyń tóraǵalyq etýi, Birikken Ulttar Uıymynyń Qaýipsizdik Keńesine turaqty emes múshesi retinde qatysýy.
Osy qysqa maqalamdy M.V.Lomonosov atyndaǵy Máskeý memlekettik ýnıversıtetiniń rektory Vıktor Sadovnıchııdiń 2021 jylǵy 10 jeltoqsanda ótken Qazaqstan Táýelsizdiginiń 30 jyldyǵyna arnalǵan «Kóshbasshylyq. Turaqtylyq. Progress» atty ǵylymı-praktıkalyq konferensııasynda sóılegen sózimen aıaqtaǵym keledi: «Táýelsiz Qazaqstan 30 jyl ishinde orasan zor jetistikterge qol jetkizdi, álemdik qoǵamdastyqtyń moıyndalǵan ári syıly múshesi boldy. Qazaqstannyń qazirgi zamanǵy tarıhy, onyń tabystary men jeńisteri Qazaqstan halqynyń tarıhy men taǵdyrynda mańyzdy ról oınap kele jatqan asa kórnekti tarıhı tulǵa – Qazaqstannyń Tuńǵysh Prezıdenti – Elbasy Nursultan Nazarbaevtyń esimimen ajyramas birlikte».
Aıgúl QUSPAN,
Májilis depýtaty
