Oblys «jasyl aımaqqa» ótkenine qaramastan dertten demigip turǵan keıbir aýdandar «qyzyl aımaqtyń» sanatynda. Naqtyraq aıtsaq, 19 aýdannyń segizi «qyzyl aımaqtyń» qursaýynda.
– Jyl basynan beri oblysta 50 myńǵa jýyq turǵyn koronavırýs indetin juqtyrǵany belgili bolyp otyr. Onyń 43 544-i eresek adamdar bolsa, qalǵandary 14 jasqa deıingi balalar, – deıdi oblystyń bas sanıtarlyq dárigeri Aınagúl Mýsına, – indet juqtyrǵan adamdardyń basym kópshiligi qulan-taza jazylyp shyqty. 888 naýqas em qabyldaýda.
О́ńirdegi ahýal týraly saraptama jasaǵanda, sońǵy eki aptada indet juqtyrýshylardyń sany birshama kóbeıgenin aıta ketý kerek. Qazir oblys aýrýhanalarynda 300-den astam naýqas em qabyldap jatyr. Eń ókinishtisi, 36 turǵyn jan saqtaý bóliminde, úsheýiniń jaǵdaıy óte aýyr. Sóz arasynda indetke ilingenderdiń barlyǵy ekpe saldyrmaǵany belgili bolyp otyr. Osy oraıda, «saqtansań saý qalasyń» degen sózdi taǵy bir qaıtalaı otyryp, ekpe salýdyń qanshalyqty qajet ekenin ekpin túsire aıta ketelik.
Jańa oqý jyly bastalǵaly 1 myńnan astam oqýshy indet juqtyrǵan. 31 bilim oshaǵynyń 47 synyby karantınge jabylyp, qashyqtan oqytý júıesine kóshirilgen.
Aǵymdaǵy jyldyń 20 qarashasynan bastap jappaı revaksınalaý qolǵa alyndy. Immýndyq júıeni nyǵaıtý, indetten saqtaný úshin 9 706 adam qaıtadan ekpe alǵan.
Tıimdiligi belgili bolǵan Ashyq qanatqaqty jobasyna oblys nysandarynyń 5 myńǵa jýyǵy engizildi. Onyń barlyǵyna resmı túrde QR-kodtar berilgen. Osy qosymsha arqyly «sary» jáne «qyzyl» statýsy bar 2 myńnan astam adam karantın talabyn saqtamaǵany anyqtalǵan.
Tártipti saqtap tartynsaq, «qyzyl aımaqtan» da qutylýdyń reti keletindigin kóz kórip otyr. Bári de ózimizge baılanysty.
Aqmola oblysy
