Otandyq Adal Promotions kompanııasynyń uıymdastyrýymen ótkeli otyrǵan dúbirli dodada 28 jastaǵy Meıirim Nursultanov ta kúsh synasady. Bul esim jankúıerlerge jaqsy tanys. Shyǵys Qazaqstan oblysy Aıagóz aýdanynyń týmasy kezinde jastar arasynda Azııa birinshiliginiń jeńimpazy jáne eresekter arasynda el chempıony atandy. 2016 jyldan beri Nursultanov kásipqoı rıngte judyryqtasýda. Osy aralyqta 15 kezdesý ótkizgen qandasymyz barlyǵynda jeńiske jetip, segiz básekeni merziminen buryn aıaqtady.
Meıirimniń de qarsylasy da osal emes. 36 jastaǵy reseılik boksshy Andreı Sırotkın 21 márte sharshy alańǵa kóterilip, 19 ret jeńiske jetti. Jeti básekede aıqyn basymdyq tanytty. Bir ret utylyp, taǵy bir kezdesýde teń esep tirkeldi. Osydan tórt jyl buryn Sırotkın óz elinde Nıkaragýanyń ataqty boksshysy, álemniń eks-chempıony Rıkardo Maıorgany utqan. Bul jekpe-jekte orta salmaqtaǵy WBO International nusqasynyń altyn belbeýi sarapqa salynady.
