«Halyqty áleýmettik qorǵaý salasynda birinshi jáne ekinshi toptaǵy, 18 jastan asqan psıhonevrologııalyq aýrýlary bar múgedek adamdarǵa, psıhonevrologııalyq patologııasy bar jáne tirek-qımyl apparaty buzylǵan múgedek balalarǵa stasıonar, jartylaı stasıonar jáne úıde kútim kórsetý jaǵdaılarynda arnaýly áleýmettik qyzmetterdiń kepildik berilgen kólemi usynylady. Arnaýly áleýmettik qyzmetterdiń kepildik berilgen kóleminiń tizbesi áleýmettik-turmystyq, medısınalyq, psıhologııalyq, pedagogıkalyq, eńbek, mádenı, ekonomıkalyq jáne quqyqtyq qyzmetterdi qamtıdy», dep jazdy Álıhan Smaıylov depýtattyq saýalǵa bergen jaýabynda.
Búginde elimizde stasıonarlyq úlgidegi 113 medısınalyq-áleýmettik mekeme jumys isteıdi, onda 23 myńnan astam adam, onyń ishinde múgedektigi bar adamdar qyzmet alady.
Sondaı-aq, 9 myńnan astam adamdy qamtı otyryp, 115 kúndizgi stasıonar bólimshesi, 54 myńnan astam adamdy qamtıtyn 482 úıde áleýmettik kómek kórsetý bólimshesi, 8 myńnan astam adamǵa arnalǵan Memlekettik áleýmettik tapsyrys sheńberinde 164 ÚEU, MJÁ sheńberinde 1,4 myń adamǵa qyzmet kórsetetin 7 jeke uıym jumys isteıdi.
«Atalǵan mekemelerdiń jumysy múgedek adamdardy ońaltýǵa jáne áleýmettendirýge baǵyttalǵan. Halyqty jumyspen qamtý boıynsha is-sharalar aıasynda múgedektigi bar adamdarǵa erekshe kóńil bólinedi», dep túıindedi Premer-Mınıstrdiń orynbasary.
