Investısııa tartý bıznestiń ózine baılanysty

Keshe Ortalyq kommýnıkasııalar qyzmetinde Ekonomıka jáne bıýdjettik josparlaý mınıstrligi janyndaǵy «Ekonomıkalyq zertteýler ınstıtýty» AQ-tyń prezıdenti Maqsat Muqanov baspasóz máslıhatyn ótkizdi. Ol eldegi ekonomıkanyń damýy týraly baıandady. Qazaqstan ekonomıkasynyń turaqty damyp kele jatqanyn baıandaǵan aksıonerlik qoǵam prezıdenti, damyǵan jáne damýshy elderdiń bári de ındýstrııalandyrý sharasyn júrgizip jatqanyn aıtty. Ekonomıkalyq damýdy ártaraptandyrý isi Qazaqstanda da myqtap qolǵa alynǵanyna toqtalyp, sonyń negizinde ındýs­trııalandyrý baǵdarlamasynyń birinshi besjyldyǵynda atqa­rylǵan jumystar jóninde áńgi­meledi. Degenmen, ekonomıkany ártaraptandyrý bir kúnniń ǵana sharýasy emes ekenine nazar aýdardy. –  Osy kúnde elimizde óńdeýshi sektor ekonomıka ósiminiń negizgi qozǵaýshy kúshi bolyp otyr. Desem de, bizde qazir eki uǵym qa­lyptasqan.  Olar – maqsatty eko­no­mıka men memleket bız­neske kedergi keltirip otyr degen jańsaq pikir bar. Buǵan baı­la­nysty aıtarym, memleket qa­zirgi ýaqytta ekonomıkany árta­rap­tandyrý boıynsha jumys júrgizip jatyr. Qazaqstan qazirgi ýaqytta óziniń aldyna úlken mindet qoıyp otyr. Údemeli ın­dýs­trııalyq-ınnovasııalyq da­mý baǵdarlamasyn júzege asyryp, ındýstrııalandyrýdyń ekinshi besjyldyǵyn ázirleýge kirisken. Árıne, bárin bir ýaqytta júzege asyrý múmkin emes. Osyny eskerip, keıbir oryn alǵan kedergilerge túsinistikpen qarap, memlekettiń bıznes salasyndaǵy saıasatyn qoldaý kerek, dedi M.Muqanov. Ol bıylǵy jyl elimiz úshin eń mańyzdy kezeńniń basy ekenin de aıtty. Qazaqstan ekonomıkasynyń damýyn turaqtandyratyn ındýs­trııalandyrý baǵdarlamasynyń ekinshi besjyldyǵy aýqymdy is­ter­di qamtıtynyn tilge tıek etti. «Shıkizat eksporttaýdan ony túbegeıli óńdep, sodan keıin na­ryqqa shyǵarý isi júzege asqanda ǵana Qazaqstan qazirgi alǵa qoıǵan maqsatyna jetetin bolady», dep bir qaıyrdy. Ol úshin memleket bıznestiń damýyna kedergi keltirip otyr degen jalǵan uǵymnan arylyp, kásipkerler úlken joba-josparlardy qaımyqpaı qolǵa alýy kerektigin alǵa tartty. Baıandamashy memleketimiz túrli salany óristi damytý maq­satyna ınvestısııa tartý úshin de qolaıly jaǵdaı ja­sap otyrǵanyn táptishtedi. Sóı­te kelip, «Qazaqstanda ınves­tı­sııaǵa qolaıly jaǵdaı jasaý tek memlekettik sharalarmen shektel­meýi tıis. Otandyq kásip­ker­lerdiń áleýetti ınves­torlarmen ju­mys isteı bilý sheberligi de osy máseleniń mańyzdy sharty bolyp tabylady. Memleket tarapynan salyqtar jáne ınvestısııalyq jeńildikter turǵysynan kóptegen qolaıly jaǵdaılar jasalyp otyr. Aıryqsha kedendik rejimde ju­mys isteıtin arnaıy aımaqtar qu­rylýda jáne olar óńdeýshi sektor úshin óte qolaıly ári yńǵaıly», dedi M.Muqanov. Nurbaı ELMURATOV, «Egemen Qazaqstan».