Qoǵam senim artady

Oǵan búkil el bolyp birigip, toıtarys berdik. Kontrterrorıstik opera­sııanyń negizgi fazasy aıaq­talýǵa jaqyndady, sońǵy máli­metter bo­ıynsha elimizdiń barlyq óńirinde ahýal turaqty. Bul rette Memleket basshysy UQShU-nyń bitim­gerlik kúshteriniń kómegi týraly Ujymdyq qaýipsizdik týra­ly shart uıymynyń kezekten tys ses­sııa­synda sóılegen sózinde tolyq­taı aıtyp ketti. Al Májilis otyrysyn­da Qasym-Jomart Toqaev UQShU bitim­­gerlik kúshteriniń negizgi mıs­sııa­­sy­nyń sátti aıaqtalǵanyn málim­dep, eki kúnnen keıin UQShU-nyń birles­ken bitimgerlik kontın­gentin Qazaq­stannan kezeń-kezeńimen shyǵarý bastalatynyn atap kórsetti.

Sondaı-aq keshe Prezıdenttiń usyny­sy­men Premer-Mınıstr la­ýazymyna Álıhan Smaıylovtyń kandıdatýrasy Májilis depýtat­tarynyń biraýyzdan qoldaýymen bekitildi. Premer-Mınıstr kandıdatýrasyn tańdaýda memleketimizdiń aldynda turǵan memlekettik qarjy men ekonomıkany qaıta jańǵyr­tý boıynsha aýqymdy mindetterdi júzege asyrý máseleleri de úlken ról atqardy.

Jalpy, Prezıdent Úkimet basshysy men quramy aldynda qoıǵan ma­ńyzdy mindetterdi birneshe blok­qa bólýge bolady. Eń aldymen, elimizdiń áskerı, quqyq qorǵaý jáne qarýly kúshter salasyn reformalaý máselesi. Jáne ol óte zańdy, ári sońǵy jaǵdaılar kórsetkendeı – ýaqyt keshiktirmeıtin mindet. «Elimizdiń qaýipsizdigin nyǵaıtý jáne qaýip-qaterdiń aldyn alý úshin shuǵyl is-sharalardy júzege asyrý qajet. Memlekettik shekarany nyǵaıtýymyz kerek», dedi Prezıdent. Ol úshin áskerı-kólik avıasııasy parkin tolyqtyrý isin, ishki isterdiń arnaıy otrıadtaryn nyǵaıtý, armııanyń daıyndyǵyn kúsheıtý, Ulttyq ulannyń sandyq ári sapalyq mazmunyn keńeıtý sharalaryn, ishki kóshi-qon salasyn, shekara qyzmetin qolǵa alý kerek ekeni anyq. Sondaı-aq mamandardyń jáne sa­rapshylardyń pikirinshe, bul qu­ry­lymdar arasyndaǵy ózara is-áreketti, biryńǵaı áreket algorıtm­derin jolǵa qoıý máselesi de óte mańyzdy.

Bul rette dinı ekstremızm, radıkaldy toptardyń problemasy da ózek­tene túsýde, bul jaǵdaıǵa arna­ıy kóńil bólip, taldaý men naqty she­shim­der tetikterin oılastyrǵan jón.

Ekinshi – ekonomıkalyq blok. Qazirgi tańda teńsizdik máselesi, múliktik jiktelý baıqala bastady, sonymen birge halyqtyń áleýmettik problemalary tolyq sheshilmeı jatqany da barshaǵa belgili. Mem­leket basshysy osy problemalar­dy ashyq kórsetip, Úkimetti kópshi­liktiń kókeıinde júrgen «Samuryq-Qazyna» qory jáne basqa da ult­tyq kompanııalardyń satyp alý­larynyń ashyqtyǵyna qatysty máse­lelerdi, jekeshelendirýge qa­tys­ty sheshimderiniń tolyq, ashyq ári aıqyn bolýy, ekonomıkadaǵy olı­gapolııa, bıznesti qoldaýǵa ar­nal­ǵan memlekettik sharalardyń kem­­shilikteri, jemqorlyq sekildi mem­­lekettiń damýyn tejeıtin prob­le­ma­lardy sheshýge shaqyrdy.

Úshinshiden, memlekettik qyzmet pen memlekettik basqarý júıesine arnalǵan blok. Osy ýaqytqa deıin de memlekettik qyzmetkerlerdiń tıim­diligi týraly aıtylyp kele jatyr. Memlekettik qyzmetkerler sany 15 paıyzǵa deıin qysqartyldy. Osy­men Memleket basshysy qysqar­tý­dy toqtatýǵa usyndy. Alaıda bul saladaǵy sapalyq, mazmun­dyq jumysqa asa nazar bólý qajet­tiligi alǵa qoıyldy. Merıtokratııa qaǵıdatyn durys túsinip, ony tıimdi ári aqylmen iske asyrýǵa shaqyrdy.

Tórtinshiden, áleýmettik sala­nyń sapalyq turǵyda jańarýy. Ol álbette, halyqtyń ál-aýqatyn, taby­syn kóterý, medısınalyq, bilim berý, áleýmettik ıgilikterin keder­gisiz, tolyq mólsherde paıdalaný, olar­dyń qoljetimdi bolýymen baı­la­nys­ty. Osy rette Prezıdent Qasym-Jomart Toqaev Áleýmettik kodeks­te osynyń barlyǵy sońǵy ahýal­dy, pan­demııanyń saldaryn eskere otyryp, kórinis tabý kerektigine asa mán berdi.

Memleket basshysynyń aıtýynsha, memlekettik bıýdjettiń 50 paıyzy­nan kóbi áleýmettik salaǵa jumsala­dy, degenmen ol áli de jet­kiliksiz. Bul oraıda, densaýlyq, balalardy qorǵaý, bilim berý sekildi salalardy qoldaý maqsatynda Qoǵam­dyq qor tetigin paıdalaný týraly Pre­zıdenttiń usynysy, meniń oıym­sha, óte oryndy ári halyqaralyq tájirıbege saı.

Memleketti ári qaraı damytýdaǵy osy aýqymdy mindetterdi ashyp kórsetken Prezıdent Q.Toqaevtyń halyqtyń jaǵdaıyn jiti túsinip, áleýmettik-ekonomıkalyq salalarda beleń alyp jatqan kemshilikter men qıyndyqtardy eńserýge bar kúshin salatynyna búkil qoǵam senim artady.

Zarema ShÁÝKENOVA,

Qazaqstan Respýblıkasynyń Prezıdenti janyndaǵy Qazaqstan strategııalyq zertteýler ınstıtýtynyń dırektory