Oblystaǵy jalpy ahýal turaqty. Osy kúnderi óńirde birde-bir adam zardap shekken joq. Adamdardyń jeke bostandyǵy men múlkine qol suǵýshylyq ta bolǵan emes. Turǵyndar tártip engizý sharalaryna túsinistikpen qarap, qoldaý bildirýde. Petropavl qalasyna kiretin kúre joldarǵa bes blok-beket qoıylǵan, al jalpy oblys boıynsha budan basqa 20 ótkizý beketi ornatylǵan. Osy kúnge deıin blok-beketterde 17 myń birlik kólik tekserildi. Onyń arasynda Qazaqstan aýmaǵyna ótýge senimdi negizi bolmaǵan 451 kólik qaıtaryldy.
Memlekettik organdar men mańyzdy nysandar shtattyq rejimde jumys isteýde. Azyq-túlik tapshylyǵy joq, baǵa birshama turaqty. Q.Aqsaqalov Soltústik Qazaqstanda gaz baǵasy eldegi eń qymbat degen pikirdi joqqa shyǵardy. «Bizdegi gaz baǵasy Aqmola, Almaty, Qostanaı, Qaraǵandy jáne Pavlodar oblystarymen birdeı», dedi ol.
Internet oblysta belgili bir ýaqytqa ǵana berilip tur. Ákimniń aıtýyna qaraǵanda, bul birtindep uzartylatyn kórinedi. «Oblysta bankomattarǵa aqsha salý jumystary júrgizilýde, negizgi bankomattarda aqsha bar. Qaladaǵy birqatar sýpermarkette arnaıy jeli arqyly aqshasyz tólemder qabyldanady. «Halyq banktiń» oblystaǵy bólimsheleri óz jumysyn bastady. Bankterge arnaıy kúzet qoıyldy», dedi ákim.
Elimizdiń barlyq óńiri sııaqty Soltústik Qazaqstanda da terrorızmge qarsy saqtyq operasııalary júrgizilýde. Jalǵa beriletin barlyq turǵyn úıler tekserilip, olardyń turǵyndary anyqtalýda. Ákim óziniń sózinde tynyshtyqty saqtaýǵa barlyq turǵynnyń qatysýyn surady. «Mańaılaryńyzda kúdikti adamdar baıqalsa, dereý +7 778 363 3780 telefonyna habarlasyńyzdar», dedi ol.
TJ engizilgennen beri polısııa organdaryna barlyǵy 255 adam jetkizilgen bolsa, olardyń 72-i – tótenshe jaǵdaı tártipterin buzǵandar. Solardyń ishinde 34 jeke tulǵaǵa sottyń sheshimimen ákimshilik jaýapkershilik júkteldi. Al spırttik sýsyndar satqan 4 zańdy tulǵaǵa aıyppul salyndy.
Qazir oblystyq BAQ arqyly komendanttyq saǵattyń tártipteri men mańyzdylyǵy aıtylyp, komendant halyqty qulaqtandyryp turady.
Soltústik Qazaqstan oblysy
