Ekonomıkalyq saıasatymyzdyń maqsaty aıqyn. Bul – zaman talabyna saı áleýmettik baǵdary bar naryqtyq ekonomıka qurý jáne damytý. Memleket basshysy «Bul júıeniń ózeginde qoǵam aldyndaǵy jaýapkershiligin sezine biletin kásipkerlerimizdiń aýqymdy toby turatyny anyq. Iаǵnı bul – óziniń jáne balalarynyń taǵdyryn Qazaqstanmen ǵana baılanystyratyn kásipkerler» dep qazaq kásipkerlerinen úmittenetinin aıtty.
Memleket basshysy aıtyp ótkendeı, kásipkerler el bolashaǵy úshin ózine jaýapkershilik júkteýge daıyn. Sol sebepti kásipkerlikti damytý úshin júıeli jumys atqarý óte mańyzdy. Osyǵan deıin Memleket basshysy bızneske túsken bıýrokratııalyq salmaqty aıtarlyqtaı azaıtyp, onyń ósip-órkendeýine jol ashatyn zańǵa qol qoıdy. Úkimet osy zańnyń áleýetin naqty is júzinde paıdalanýy qajet dep oılaımyn. Jumys júıeli túrde jolǵa qoıylsa, biraz másele sheshiledi, aýyldaǵy bıznestiń kúretamyryna qan júgiredi.
Kásipker retinde alys-jaqyn shetelderge kóp shyǵamyn. Barǵan jerimde bıznestiń tabıǵatyna kóbirek nazar aýdarýǵa tyrysamyn. Mysaly, QHR-da aýyl sharýashylylyǵy sektorynan shyqqan aýqatty kásipkerler óte kóp. Sońǵy kezde Reseıde de, kórshimiz О́zbekstanda da baıqala bastady. Sondyqtan mysaly, elimizdiń batysynda munaı óńdeıtin zaýyttar, ońtústikte jemisti qaıta óńdeıtin, balalarǵa arnalǵan túrli shyryndardy daıyndaıtyn shaǵyn kásiporyndardy ashýǵa bolady. Sút ónimderiniń klasterin de osy ońtústik baǵytta jandandyrýǵa bolar edi. Bizdiń elde bıznesti ortalyqta shoǵyrlandyrý arqyly bıznestiń múmkindigin shektep otyrmyz. Onyń zardaby qandaı bolatynyn Almaty oqıǵasynan kórdik. Qazir IJО́-degi ShOB-tyń úlesi mardymsyz. Munyń basty sebebi, joǵaryda aıtyp ótkendeı, bıznestiń tek ortalyqta ǵana shoǵyrlanýy. Bul kózqaras kezinde ózin ózi aqtaǵan shyǵar. Endi ortalyqta tamyrlanǵan bıznestiń aýylǵa tamyr jaıýyna múmkindik berý kerek.
Áleýmettik jaǵynan az qamtylǵan otbasylardyń basym kópshiligi aýylda turady. Bul problemany járdemaqy arqyly sheshýdiń múmkin emestigi belgili. Qazir aýylǵa janymyz ashysa, bıznesin ashyp, ashyq naryqta ózin ózi qamtamasyz etýge múmkindik berý kerek. Bul ortalyqtan alysta júrgen tulǵalardyń el kóleminde tanylýyna, qyzmetteriniń ósýine jol ashady.
Mahambet ASABAEV,
kásipker
ALMATY
