QR UQK baspasóz qyzmetiniń habarlaýynsha, shekara qyzmeti UQK aýmaqtyq bólimshelerimen ózara is-qımyl jasap, IIM «Arlan» arnaıy maqsattaǵy bólimshesin tarta otyryp, Almaty oblysynda jedel-izdestirý is-sharalaryn júrgizýde.
Vedomstvoda naqtylaǵandaı, nátıjesinde Taldyqorǵan polısııa departamentine shabýyl jasady degen kúdikpen segiz adam jáne Almatydaǵy tártipsizdikter men tonaýlarǵa qatysy bar segiz adam ustaldy.
Ustalǵandar polısııa bólimshelerine jetkizildi.
Sondaı-aq vedomstvo 11 qańtarda Túrkistan oblysyndaǵy «Shymkent» avıasııalyq ótkizý pýnktinde Túrkistan – Stambýl baǵytyndaǵy KS-7425 reısin rásimdeý kezinde Qyzylordadaǵy mıtıngterge qatysqan jáne áleýmettik jelilerdiń messendjerleri arqyly azamattardy tártipsizdikterge qatysýǵa shaqyrý týraly aqparatty taratqan Qazaqstan azamaty anyqtalǵanyn habarlady.
Ustalǵan azamat Shymkent qalasynyń jelilik polısııa bólimine jetkizildi.
10 qańtarda Qostanaı oblysynyń «Obaǵan» (avtomobıl) ótkizý pýnktinde súzý is-sharalary sheńberinde 1986 jyly týǵan P. esimdi Taraz turǵyny ustaldy. Tekserý is-sharalary barysynda ustalǵan adamnyń uıaly telefonynan 5 qańtarda qurylǵan kúsh qurylymdarynyń arnaıy kıim-kesheginen (qorǵanys dýlyǵasy, túsirý keýdeshesi, metall qalqan jáne rezeńke taıaq) onyń fotosýreti tabyldy.
Kúdikti tergeý is-sharalaryn júrgizý maqsatynda Uzynkól APB-ne jetkizildi.
