Atyraý qalasyndaǵy 5546 áskerı bóliminiń jaýyngerleri qala ákimdigin buzaqylardan qorǵady. Qaqtyǵys barysynda atalǵan áskerı bólimniń 28 jaýyngeri jaraqat alǵan. Solardyń biri - qatardaǵy Dıas Samat. Ol jappaı tártipsizdik bastalǵan kúni qoǵamdyq tártip pen qaýipsizdikti qamtamasyz etý boıynsha qyzmet atqaryp, aldyńǵy qatarda turdy.
«Bastapqyda barlyǵy beıbit sherý retinde bastaldy. Bizge kúsh qoldanbaý týraly buıryq berdi. О́ıtkeni, ondaǵy adamdar beıbit turǵyndar. Biz qoǵamdyq tártipti qamtamasyz etý boıynsha qyzmetti qamtamasyz etip sapta turdyq. Bir kezde top ishinen jas jigitter shyǵyp, bizge shabýyl jasady. Qoldaryna túsken zattyń barlyǵyn laqtyrdy, armatýra, tas, ishinde gaz ballondary da boldy. Men arttaǵy qarýlas dostarymdy qorǵap turǵanmyn. Qorǵanysh qalqany tómen túsirgen sátte aýyr zat ushyp kelip oń betime tıdi. Barlyǵy bir-birin ıterip, qaqtyǵys, tóbeles bastaldy. Meniń oń betim tolyqtaı qanady. Sonda da, dostarymdy tastamadym. Kúshim jetkenshe, qyzmetimdi atqardym», dep esine túsirdi jas sarbaz.
Jas sarbaz Batys Qazaqstan oblysy Jánibek aýdanynan Ulttyq ulan qataryna shaqyrylǵan. Búginde aýrýhanaǵa jatqyzyldy. Jaǵdaıy qalypty. Jýyrda emdelgennen keıin áskerı qyzmetine qaıta oralady. Bar tilegi el amandyǵy, tynyshtyq ornatý mindeti.
Jalpy Almaty, Shymkent qalalarynda jáne basqa da oblys ortalyqtarynda quqyqtyq táritipti qamtamasyz etýde buzaqy toppen qarsylasýdyń nátıjesinde jaraqat alǵan Ulttyq ulan áskerı qyzmetshilerdiń sany 394 adamǵa jetti.
Budan bólek, jappaı tártipsizdik kezinde Ulttyq ulannyń 90-nan asa áskerı tehnıkasy syndy.
