Qazaqstan • 14 Qańtar, 2022

Elordaǵa zańsyz kelgen 41 adam Qazaqstan aýmaǵynan shyǵaryldy

46 ret kórsetildi

Tótenshe jaǵdaı rejımi kezeńinde elordaǵa zańsyz kelgen 41 adam Qazaqstan aýmaǵynan shyǵaryldy. Bul týraly Nur-Sultan qalalyq Polısııa departamentinen málim etti, dep habarlaıdy Egemen.kz

«Qazirgi ýaqytta elordada jaǵdaı turaqty. Quqyq qorǵaý organdary tıisti qoǵamdyq tártip pen azamattardyń qaýipsizdigin qamtamasyz etýde. Qala perımetri boıynsha 6 blokbeket táýliktik rejımde jumys istep tur. Bir táýliktiń ishinde qalada 11 qylmys, 105 jol-kólik oqıǵasy tirkeldi, jaraqat alǵandar joq. Tótenshe jaǵdaı rejımi jarııalanǵannan beri belgilengen rejımdi buzý nemese memlekettik organ belgilegen talaptardy oryndamaýdyń 353 faktisi tirkeldi. Kinálilerge qatysty sheshimdi sot qabyldady», dep atap ótedi departamentten.

 

Vedomstvo málimetinshe, tótenshe jaǵdaı kezinde elorda kósheleri men qoǵamdyq oryndarda tıisti quqyqtyq tártipti qamtamasyz etý maqsatynda Nur-Sultan qalasynyń polısııa qyzmetkerleri Qazaqstan Respýblıkasynda bolý qaǵıdalaryn buzǵan sheteldikterdi anyqtaý boıynsha is-sharalar júrgizýde. Bazarlardyń, saýda úıleriniń, sýpermarketter men qurylys nysandarynyń jáne taǵy basqa nysandardyń aýmaǵynda jergilikti-reıdtik is-sharalar ótkizilýde.

 

Kóshi-qon zańnamasyn buzýdyń 1 300-den astam faktisi anyqtaldy. Onyń ishinde 295 faktisi shetel azamattary tarapynan jasalǵan, 41 shetel azamaty elden shyǵaryldy. Sonymen qatar tirkeýsiz nemese jeke basyn kýálandyratyn qujattarsyz turyp jatqany jáne turǵyn úı ıeleriniń óz úılerinde turmaıtyn adamdardy tirkeýge jol bergenderi úshin Qazaqstan Respýblıkasynyń 940-tan astam azamaty jaýapqa tartyldy.

 

«Elimizdiń kóshi-qon salasyndaǵy zańnamasyn buzǵany úshin sheteldikterdi qabyldaǵan 82 azamat ákimshilik jaýapqa tartyldy. Osy baǵyttaǵy jumystar jalǵasýda. Atalǵan aldyn alý is-sharasyn ótkizý barysynda polısııa qyzmetkerleri elde bolý merzimi ótkennen keıin ketýden jaltarǵan eki shetel azamatyn anyqtady. Quqyq buzýshylarǵa qatysty ÁQBtK-niń 517-baby 4-bóligi boıynsha ákimshilik hattama toltyryldy. Ákimshilik quqyq buzýshylyqtar jónindegi mamandandyrylǵan aýdanaralyq sottyń sheshimimen sheteldikter Respýblıkadan tysqary jerge shyǵaryldy. Ýchaskelik polısııa ınspektorlary 5882 jaldamaly turǵyn úı men 490 hosteldi tekserdi», - delingen vedomstvo málimetinde.

 

Sońǵy jańalyqtar

Uqsas jańalyqtar