Aımaqtar • 14 Qańtar, 2022

Batys Qazaqstan «qyzyl» aımaqqa kirdi

62 ret kórsetildi

Koronavırýs matrısasy boıynsha «sary aımaqqa» kirgenine úsh-aq kún bolǵan Batys Qazaqstan oblysy 14 qańtarda eń qaýipti «qyzyl aımaq» qataryna qosyldy.

Jańa jyldyń 13 kúninde óńirde 537 adamǵa «covid-19» dıagnozy qoıylǵan. Al jalpy epıdemııa bastalǵaly oblysta 40 607 adam COVID-19 juqtyryp, 15 282 adam ınfeksııalyq stasıonarlarda em alǵan. 857 adam osy dertten kóz jumdy.

«Batys Qazaqstan oblysynda 13 qańtar kúni ǵana 186 adamnyń aýyrǵany tirkeldi. Jańa jyldan beri oblysta 18 oqýshy, 14 muǵalim, 3 balabaqsha qyzmetkeri, 4 stýdent osyndaı dıagnozben tirkeldi», dedi oblystyq densaýlyq saqtaý basqarmasy Medısınalyq kómekti uıymdastyrý bóliminiń basshysy Aıgúl Qulbaraqova.

Naýqastardyń kóbi, ıaǵnı 360-y Oral qalasynda turady. Báıterek aýdanynda – 64, Bórli aýdanynda – 59, Terekti aýdanynda – 17, Jańaqala aýdanynda – 14 jaǵdaı tirkelgen.

Sońǵy aptada ótken aptamen salystyrǵanda aýrýshańdyq deıgeıi 85,9%-ǵa (65-ten 464-ke) ósken!

«Koronavırýstyq ınfeksııa ahýaly oblysta da, elimizde de nasharlap barady. Sondaı-aq jańa «omıkron» shtamyn juqtyrý qaýpi bar. Jańa shtamnyń ereksheligi sol, juqtyrý qaýpi joǵary, ári vırýsty qaıta juqtyrý yqtımaldyǵy da óte úlken. Vırýs birinshi túsetin joǵary tynys joldarynda «omıkron» «delta» shtamyna qaraǵanda 70 ese tez kóbeıedi», deıdi Batys Qazaqstan oblystyq sanıtarlyq-epıdemıologııalyq baqylaý deparatamenti basshysynyń orynbasary Nurlybek Mustaev.

Mamandardyń aıtýynsha, ázirge naýqastardy emdeıtin stasıonardan da, medıkamentten de tapshylyq joq. Aýrýhanalarda arnaıy daıyndalǵan tósektiń 78 paıyzy bos tur.

2021 jyldyń 1-shi aqpanda vaksınalaý jumysy bastalǵaly óńirde óńirde ekpeniń birinshi komponentimen – 258 101 (39%) adam, ekinshi komponentimen – 244 900 adam (37%) egilgen. Sondaı-aq oblysta 22 902 adam (9,3%) revaksınasııadan ótken. Ekpe alǵysy keletin turǵyndarǵa birneshe tańdaý bar. Sonyń ishinde «Spýtnık Lite» vaksınasyna qatysty partııanyń bir bóligi Qazaqstanǵa kelip jetken. Jaqyn kúnderi oblysqa da jetkizilip, tıisti qaýly shyqqan soń qoldanylatyn bolady.

Nurlybek Mustaevtyń aıtýynsha, aldaǵy ýaqytta eki ese kóbeıýi múmkin.

Batys Qazaqstan oblysyndaǵy vedomstvoaralyq komıssııanyń sheshimine oraı, epıdemıologııalyq ahýal jaqsarǵanǵa deıin oblys aýmaǵynda qoǵamdyq oryndarda, kóshede jáni otbasynda da barlyq kópshilik sharalardy ótkizýge tıym salyndy. Bul jerde tek marqumdy sońǵy saparǵa shyǵaryp salý úshin ǵana 30 adamǵa deıin jınalýǵa ruqsat beriledi. Al teatr, fılarmonııa, sırk, konsert zaldarynda kópshilik sharalar ýaqytsha toqtaıdy, juma namaz, dinı qulshylyqtar ótpeıdi. Túngi klýbtar, karaoke barlar toqtaıdy. Jeke kezdesýlerde 10 adamnan artyq jınalýǵa bolmaıdy jáne bul adamdar ekpe alǵan bolýy tıis. Qoǵamdyq tamaqtaný oryndarynda bir ústelde 4 adamnan artyq otyrýǵa tıym salynady. «Ashyq» jobasyna qatysatyn kınoteatrlar tek zaldyń 30 paıyzyna ǵana bılet satady. Kommýnaldyq sharýashylyq kásiporyndarynan bólek memlekettik mekemeler 70 paıyzǵa deıin qyzmetkerlerin qashyqtan jumys rejımine aýystyrýy tıis.

Jaqyn kúnderi orta bilim salasynda qysqy kanıkýl aıaqtalmaq.

Nurlybek Mustaevtyń aıtýynsha, «qyzyl aımaq» statýsy kezinde óńirdegi oqýshy sany 600-ge jetpeıtin aýyl mektepterinde oqý úrdisi ádettegideı júredi. Al shákirt sany 600-den asatyn iri mektepter onlaın oqý formatyna kóshedi. Kolledjder men joǵary oqý oryndary stýdentteri jaǵdaıǵa qaraı aralas formatta bilim alady.

Sońǵy jańalyqtar

Tozaq qaqpasy

Rýhanııat • Keshe

Eskilik pen estilik

Ádebıet • Keshe

Polısııa: Kadr hám qadir

Qazaqstan • Keshe

Máńgilik saıahatshylar

О́ner • Keshe

Uqsas jańalyqtar