Qazaqstanda Naýryz merekesiniń demalys kúnderi bes kúnge ulasady. Mereke kúnderi 2010 jyly belgilengen tártipke sáıkes naýryzdyń 21-nen 23-ine deıin sozylsa, taǵy eki kún senbi jáne jeksenbiniń esebinen tolyǵady. Bul týraly Headline.kz habarlady.
Sonymen, qazaqstandyqtar 2014 jyly 21- 25 naýryz (juma, senbi, jeksenbi, dúısenbi, seısenbi) aralyǵyndaǵy 5 kúndi demalyspen ótkizedi.
BUU-nyń 2010 jyly qabyldaǵan qarary boıynsha 21 naýryz kúni Halyqaralyq Naýryz meıramy bolyp tanylǵan. Sondyqtan BUU osy uıymǵa múshe memleketterdi ejelden kele jatqan osy meıramdy keńinen taratýǵa atsalysýǵa shaqyrady.
Naýryz meıramy – Qazaqstanda kóktemgi jańǵyrý merekesi. Ol Shyǵys halyqtarynda musylmandyq qabyldanǵanǵa deıin kóp buryn paıda bolǵan. Sondyqtan onda dinı salt-dástúrler men úrdister joq. Shyǵys kúntizbesi boıynsha Naýryz – kóktemgi kún men túnniń teńesýimen birge keletin jańa jyldyń basy.
Ertede jurt Naýryzdyń keler aldynda óz úıleri men sharýalaryn túgel tártipke keltirip, meıram qurmetine aǵash pen gúl ekken. Sebebi, Áz Naýryz taza úıde turatyn jaqsy adamdarǵa keledi, sondyqtan bul adamdar aýrý-syrqaýdan, sátsizdikter men keleńsizdikterden aman bolady dep sanalǵan.
Ulystyń uly kúni merekesi jyldaǵy dástúr boıynsha Qazaqstannyń barlyq aımaqtarynda keń kólemde, joǵary kóńil kúımen atap ótiledi. Ol, máselen, Ońtústik Qazaqstan oblysynda ataýly 9 kúnge sozylsa, Shyǵys Qazaqstan óńiriniń jurtshylyǵy 7 kúndi osylaı ótkizýge sheshim qabyldap otyr. Naýryz kúnderi án men kúıge kóptep oryn beriledi, túrli ulttyq oıyndar oınalyp, sport jarystary sóreden shyǵady, san qıly konkýrstar ótkizilip, jármeńkeler qanatyn jaıady. Bul kúni, álbette, jurt úıleriniń mańy men qoǵamdyq oryndarǵa, saıabaqtar men kóshelerge aǵash egedi.
Murat Aıtqoja.
Derekkóz: Headline.kz .
Foto: Headline.kz .
