Budan birneshe kún buryn Ońtústik Qytaı teńizi ústinde úshti-kúıli joǵalyp ketken Malaızııa áýe kompanııasynyń avıalaıneri endi Úndi muhıty akvatorııasynan izdestiriletin bolyp otyr. Bul týraly «Interfaks» habarlady.
Keshe, 14 naýryz kúni tańerteń spýtnıkterge joǵalyp ketken Boeing-777-200 ushaǵynyń bortyndaǵy dybys ımpýlsin alýdyń oraıy keldi. Áýe Áskerı kúshteriniń málimetterinshe, sıgnal laıner dıspetcherler radarynan joǵalyp ketkesin bes saǵattan keıin tirkelgen. Ol kezde ushaq «qalypty» bıiktikte bara jatqanyn, al áýe kemesiniń kórsetkishteri barlyq talaptarǵa saı bolǵanyn aıtady sarapshylar.
Buǵan deıin BAQ betterinde ushaqtyń joǵalyp ketkennen keıin 4 saǵatqa jýyq ýaqyt áýede júrgeni jaıynda aqpar taratylǵan edi. Ras, Malaızııadaǵylar bul aqpardyń «dál» emes ekenin de alǵa tartýda. Sondaı-aq dıspetcherlerdiń ushaqty baqylap otyrǵan júıeleri birinen keıin biri isten shyǵa bastaǵany da baıandalǵan. Munyń tehnıkalyq aqaýlyq bolǵan-bolmaǵany ázirge belgisiz. Sarapshylar osyǵan oraı júıede olqylyqtar oryn alǵan kezde onyń domıno prınsıpimen isten shyǵatynyn aıtady.
Eske sala keteıik, bortynda 239 jolaýshy bar Malaızııa avıalaıneri naýryzdyń 7-sinen 8-ine qaraǵan túni joǵalyp ketken bolatyn. Ushaq áýejaıdan ushyp shyqqannan keıin shamamen eki saǵattan soń radardyń baqylaýynan shyǵyp ketip, birjola joq bolyp ketti. Boljam boıynsha bul kezde laıner Ońtústik Qytaı teńizi ústinde ushyp bara jatýy tıis edi. Sol kezde onyń kelgen jaǵyna, ıaǵnı Kýala-Lýmpýrǵa qaraı kilt burylǵany da belgili. Biraq sodan keıin ony kórgen de, habaryn estigen de eshkim joq. Keıin tek bul ushaqqa ózge bireýlerdiń pasporttaryn urlap alǵan eki adamnyń otyrǵany belgili boldy. Olar ushaqqa otyrar kezdegi tirkeýden de qatar ótipti.
Sodan beri ondaǵan eldiń 40-tan asa ushaǵy men 40-qa jýyq kemesi apat oryn alýy múmkin degen boldamdy aýdandy ersili-qarsyly sharlap jatyr. Alaıda, ushaqtan esh habar shyqpady. Endi onyń Úndistan aýmaǵynan asyp, Pákstan jerinen ótip, Úndi muhıtynyń ústine deıin jetkeni aıtylýda. Olaı bolsa, ushaq qýǵynmen alyp ketilgen be? Munyń bári qazir jumbaq qalpynda qalyp tur.
Osy jumbaqty sheshý úshin izdeýshiler nazarlaryn Úndi muhıtynyń akvatorııasyna qaraı aýdara bastady.
Murat Aıtqoja.
Derekkóz: Interfaks.
Foto: Associated Press.
