Qyzylorda: Áz Naýryz merekesine daıyndyq bastalyp ketti

Qyzylorda oblysynyń Qazaly aýdanynda Ulystyń uly kúnine arnalǵan merekelik sharalar bastalyp ketti. Bul týraly Qazaly aýdany ákimdiginiń baspasóz qyzmeti habarlady. Atalǵan óńir týraly «Qazynaly Qazaly-ortaımaǵan qazany» degen qanatty sóz bar. Tarıhyn zerdelegen azamat bul aıtylǵannyń beker emestigin birden ańǵarady. Osyndaı aıtýly jerdiń azamattary aǵa-apalarynyń eleýli eńbegin  eskerýsiz qaldyrǵan emes. Máselen, belgili teatr synshysy Áshirbek Syǵaı «qazaq óneriniń aq jelkenine» teńegen Sábıra Maıqanovanyń 100 jyldyq mereıtoıyn atap ótti. Shara aıasynda jastardyń shyǵarmashylyǵyna baǵa berilip, úzdikterine baǵaly syılyqtar tabys etildi. Osy rýhanı keshtiń izin ala Qazaly aýdany Naýryz merekesin laıyqty ótkizý qamyna kiristi. Aýdan ákimi Bahyt Jahanovtyń tapsyrmasymen, ortalyq alańǵa etno aýyl ornalastyrylatyn boldy. Bul jerden ulttyq zergerlik buıymdar oryn alady. Qazir aýdandaǵy barlyq mekemeler tazalyq aılyǵyna uıymshyldyqpen atsalysýda. О́ıtkeni, Áz Naýryz  kirshiksiz kóńil men qorshaǵan ortanyń taza bolýynan nár alady. Onyń qurmetine ertede aǵash pen gúl egilgen. Bir-birine adamdar jyly lebizin bildirip, qaırymdylyq ister jasaǵan. Osy sońǵy aıtylǵandy jergilikti bılik osy Naýryz merekesi kúni taǵy qolǵa alǵaly otyr. «Tarıhy tereń Qazaly aýdanynda Naýryz merekesine daıyndyq jumystary bastalyp ketti. Ony oıdaǵydaı ótkizý úshin árbir mekeme óz aınalasynyń tazalyǵyn retke keltirý ústinde. Mereke kúni qaıyrymdylyq sharasy ótkizilip, jurtshylyqqa teatrlandyrylǵan qoıylym tartý etiledi», - delingen habarlamada. Ámirhan Almaǵanbetov. Derekkóz: Qazaly aýdany ákimdiginiń baspasóz qyzmeti. Foto: i-news.kz.