Prezıdent Qasym-Jomart Toqaev 2022 jyldy «Balalar jyly» dep jarııalaǵany belgili. Soǵan oraı Balalar jáne jasóspirimder kitaphanasy bıyl jańa jobalardy qolǵa aldy. Júzdegen jobalardyń biri «Balalar – kitap áleminde» atty kitap kórmesiniń ashylýy edi.
Kórmege balalarǵa arnalǵan klassık jazýshylardyń týyndylary, halyq aýyz ádebıetiniń ozyq úlgileri, balalar ensıklopedııasy jáne búldirshinderge arnalǵan ertegi kitaptar qoıyldy. Sondaı-aq qyzyqty oqıǵalardy baıandaıtyn ártúrli baǵyttaǵy kitaptardan turatyn «Ádebı sandyq» óz oqyrmandaryna erekshe kóńil kúı syılady. Oqýshylar osy kórmeni jyl kóleminde tamashalap, ózderin qyzyqtyrǵan kitaptaryn alyp oqı alady.
– Kitaphanamyzdyń kishkentaı oqyrmandary úshin ózderi sýretin salǵan, «Knıjkı-malyshkı» serııasymen shyqqan kitapshalar da kórme sórelerinen oryn alady. Bul bizdiń bolashaq sýretshilerimiz ben jazýshylarymyzdyń alǵashqy týyndylarynyń biri desek te bolady. Budan bólek jazýshy, jýrnalıst Marat Qabanbaevtyń «Jıhankez Tıtı» áńgimesin oqyrmandardyń suranysy boıynsha balalar jazýshysy, ustaz Baný Ahmetbekova orys tiline aýdardy. Bul kitap «VKPK ARGO» baspasynan basylyp shyǵyp, óz oqyrmandaryna jol tartty, – dep kórmemen tanystyrdy kitaphana qyzmetkeri Talant Meırambaev.
Kitap kórmesiniń ashylýynda Qazaqstan Jazýshylar odaǵynyń Shyǵys Qazaqstan oblystyq fılıalynyń tóraǵasy, jazýshy Álibek Qańtarbaev jas oqyrmandardy ataýly jylmen quttyqtap, júrekjardy tilegin joldady.
– Adam balasynyń eń jaqyny da, eń jaqsy kóretini de – bala. Tipti ómirdiń sáni men máni de osy balada. Qazaqta «Balaly úı – bazar, balasyz úı – qý mazar», «Bala – adamnyń baýyr eti» degendeı maqal-mátelder óte kóp. Adam bolyp dúnıege kelgen soń, meıli erkek, meıli áıel bolsyn, menińshe bir ǵana muratpen ómir súretin shyǵar, ol – ómirge urpaq ákelý, artyńa urpaq qaldyrý. Jalpy, Prezıdentimizdiń osy jyldy «Balalar jyly» dep ataýy teginnen-tegin emes. Halqymyz «El bolam deseń, besigińdi túze» deıdi. Besik degen – memleket. Sonyń saıasaty. Sonyń ıdeologııasy. Sondyqtan balaǵa bir jyldy ǵana arnap, sharýany bitirip tastadyq dep shirenýge bolmas. Bul taqyryp – Prezıdenttiń de, Parlamenttiń de, árbir ata-ananyń da kún tártibinde máńgilik turýy shart, – dedi qalamger.
Aıta keterligi, kitaphana ujymy uıymdastyratyn sharalardyń kóbi jastardy kitap oqýǵa tartý maqsatynda atqarylady. Nátıje joq emes. Kún saıyn oqyrmandar sanynyń artyp kele jatqany qýantady.
О́SKEMEN
