HH ǵasyrdyń ortasyndaǵy qazaq qyzynyń móp-móldir beınesi. Kózge birden ottaı basylady, kóńil jibitedi. Áınekten túsken kúnniń sáýlesine arqasyn tosqan boıjetkenniń bitim-bolmysyna qarap, sol kezeńdegi qyz-kelinshekterdiń obrazyn kórýge bolatyndaı. Bul qazaq beıneleý ónerine erekshe máner alyp kelgen ǵajaıyp sýretshi Sabyr Mámbeevtiń eńbegi.
1958 jyly jazylǵan kartına avtordyń eleýli shyǵarmalarynyń biri retinde joǵary baǵalanady. Ol árbir týyndysyna shynaıy sezimin qosyp, aldyn ala boljaýǵa bolmaıtyn tústerdiń úndestigi men mánerli úılesimdiligin beredi. Budan kompozısııasyndaǵy qarapaıym formanyń anyqtyǵyn kóremiz.
«Tereze aldynda turǵan qyz» kartınasy gúl men qyzdyń arasyndaǵy baılanystan bastaý alyp tur. Gúldiń kúltesi men arýdyń kóılegi bir tústi. Avtor quddy gúl taǵdyrly qyz ǵumyrynyń shýaqty sátimen, balaýsa shaqtaryn kenep betine quıa salǵandaı. Qolymen keýdesin basqan arýdyń uıańdyǵy men tazalyǵy baıqalady. Shyǵarma jandy sekildi.
Shynynda bul sýretkerdiń portret janryndaǵy erekshe tásili. Keıipkerdi forma retinde berip, onyń áreketin boıaý kúshimen sheship otyrady. Sodan da bolar, bul týyndy ózinshe bir erekshe qaıtalanbas sezimge bóleıdi.
Baqsańyz, qylqalam sheberi emosııalyq hám lırıkalyq sezimin, fılosofııalyq máselelerdi aldyńǵy qatarǵa qoıady. Kórkemdik sheshimi tús arqyly dınamıkalyq qozǵalys jasap, túsinýge jeńil jol ashady.
Sabyr Mámbeev qazaq beıneleý ónerinde bolyp jatqan ózgeristerge, aldyńǵy býyn tarapynan estetıkalyq tárbıe men rýhanı sezim qosqany anyq.
