Prezıdent 2021 jylǵy 1 qyrkúıektegi «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynda sybaılas jemqorlyqqa qarsy tıimdi kúresti jalǵastyrý qajettigi týraly tapsyrma berdi. Bul rette turmystyq sybaılas jemqorlyqty joıýǵa erekshe nazar aýdarý qajet.
Senattyń beıindi komıtetiniń tóraǵasy Vladımır Volkov óz sózinde Sybaılas jemqorlyqqa qarsy ymyrasyz kúres memlekettik saıasattyń negizgi basymdyqtarynyń biri bolyp tabylatynyn atap ótti.
«Turmystyq deńgeıdegi sybaılas jemqorlyqtyń aýqymy asa mańyzdy, sondyqtan belgili bir qyzmetkerdi nemese laýazymdy adamdy «yntalandyrýsyz» birde-bir kúndelikti máseleni sheshý múmkin emes degen pikir kópshiliktiń sanasyna enip ketti. Sondyqtan turmystyq sybaılas jemqorlyqqa qarsy is-qımyl sharalaryn ázirleý jáne iske asyrý baǵytynda jumys eki baǵyt boıynsha – laýazymdy adamdarmen jáne qoǵammen tikeleı araqatynasta júrgizilýge tıis dep oılaımyz», dedi depýtat.
Senatorlardyń paıymdaýynsha, turmystyq sybaılas jemqorlyq azamattyq qoǵamǵa keri áserin tıgizip, sheneýnikterdi jemqor etedi, sybaılas jemqorlyqty kúndelikti, qarapaıym, jalpy qabyldanǵan, tipti qoǵam tarapynan aıyptalmaıtyn qubylysqa aınaldyrady. Osyǵan baılanysty depýtattar azamattyq qoǵamdy tartý jáne turaqty túsindirý jumystaryn júrgizýdiń mańyzdylyǵy men qajettiligin atap ótti.
Turmystyq sybaılas jemqorlyqqa qarsy is-qımyl salasynda qabyldanyp jatqan sharalar týraly Sybaılas jemqorlyqqa qarsy is-qımyl agenttiginiń sotqa deıingi tergeý qyzmetiniń basshysy Ashat Jumaǵalıev baıandady.
«Sybaılas jemqorlyqtyń qurylymdyq sıpatyna júrgizilgen taldaý mynany kórsetip otyr. Quqyq buzýshylyqtardyń basym bóligi jergilikti atqarýshy organdardyń, ishki ister organdarynyń, kvazımemlekettik salanyń qyzmetkerlerine tıesili. Atap aıtqanda, keden qyzmeti, bilim salasy, qurylys, turǵyn úı-kommýnaldyq sharýashylyq jáne densaýlyq saqtaý salasynda kóptep kezdesedi. Ásirese keıingi jyldary para alý máselesi ózekti bolyp tur. Osylaısha, sybaılas jemqorlyqtyń kúndelikti úlesi 60 paıyzǵa teń. Jyldan-jylǵa para berý artyp keledi. Mysaly, 2015 jyly osyndaı buzýshylyqtyń úlesi 33 paıyz-
dy qurasa, byltyr onyń kólemi 60 paıyzǵa jetken», dedi A.Jumaǵalıev.
Turmystyq sybaılas jemqorlyqqa qarsy is-qımyl boıynsha júrgizilip jatqan jumystar týraly «Azamattarǵa arnalǵan Úkimet» memlekettik korporasııasy» KeAQ basqarma tóraǵasynyń orynbasary Birjan Júnisov aıtyp berdi. Ol sybaılas jemqorlyq táýekelderin tómendetý maqsatynda 2021 jyldyń 20 qyrkúıeginen bastap biryńǵaı notarıattyq aqparattyq júıe, notarıattyq mámilelerdiń barlyq túri boıynsha, muraǵa quqyq týraly kýálik, jyljymaıtyn múlikke menshik quqyǵy týraly kýálik arqyly jedeldetilgen tirkeý qyzmeti iske asyrylǵanyn jetkizdi.
«Qabyldanyp jatqan sharalar memlekettik qyzmettegi sybaılas jemqorlyq táýekelderin tómendetýge jáne qyzmetterdiń sybaılas jemqorlyqqa qarsy mádenıetin qalyptastyrýǵa baǵyttalǵan. Búgingi tańda kórsetiletin qyzmetti alýshylarmen baılanysty keleńsizdikterdi azaıtý maqsatynda áleýmettik-eńbek salasynadǵy 10 memlekettik qyzmet elektrondy formatqa aýysty», dedi B.Júnisov.
О́z kezeginde Senat janyndaǵy Jas sarapshylar klýbynyń múshesi Shyńǵys Lepsibaev otyrysqa qatysýshylar aldynda turmystyq sybaılas jemqorlyq faktorlaryn, onyń ishinde qoǵamnyń quqyqtyq saýattylyǵynyń tómen deńgeıin, quqyq qorǵaý organdary men sot tóreligine senimniń bolmaýyn, aıyppuldardyń, salyqtardyń joǵary deńgeıin, sondaı-aq memlekettik qyzmetshiniń bedeliniń bolmaýyn atap ótti.
Otyrysqa Joǵarǵy sottyń, Bas prokýratýranyń, Sybaılas jemqorlyqqa qarsy is-qımyl agenttiginiń, birqatar mınıstrlikterdiń, sondaı-aq Senat janyndaǵy Jas sarapshylar klýbynyń ókilderi qatysty.
