Prezıdent barsha qazaqstandyqtardy Naýryz merekesimen quttyqtady

Nursultan Nazarbaev «Qazaq eli» monýmenti alańynda ótken «Naýryz-2014» merekelik is-sharasyna qatysty, onda Qazaqstannyń belgili ártisteri men shyǵarmashylyq ujymdarynyń qatysýymen konsert ótti. Bul týraly Aqorda. kz habarlady. О́z sózinde Memleket basshysy barsha qazaqstandyqtardy Naýryz merekesimen quttyqtap, ol halqymyzdyń birligi men tatýlyǵynyń sımvoly bolyp tabylatynyn atap ótti. – Bul – halyqtyń uly merekesi, kún men túnniń teńelýiniń sımvoly. Birlik, baýyrlastyq, toleranttyq jáne turaqtylyqty bildiretin bul meıram 5 myń jyldan beri atap ótilip keledi. Osynyń bári – Qazaqstan júrip kele jatqan jol. Bul ıdeıany biz táýelsizdigimizdi jarııalaǵan kúnnen bastap júzege asyryp kelemiz. Bul – uly qazyna, biz ony kózdiń qarashyǵyndaı saqtaýǵa tıispiz. Elimizde 100-den astam etnos, 40-qa jýyq dinı konfessııa ókilderi tatýlyq pen dostyqqa ómir súrip keledi. Osynyń arqasynda biz memleket qurdyq, súıikti astanamyzdy turǵyzdyq, – dedi Nursultan Nazarbaev. Qazaqstan Prezıdenti qazirgi álemniń názik te kúrdeli ekenine toqtaldy. – Jyl saıyn ǵalamsharda 30-ǵa derlik qarýly qaqtyǵys oryn alyp, onda júz myńdaǵan adam qurban bolýda, 800 mıllıonǵa jýyq adam ashtyq azabyn tartýda, al 400 mıllıon adam aýyz sýǵa zárýlik kórýde. Kez kelgen keleńsiz áreket bizde bar ıgilikke zardabyn tıgizýi múmkin, – dedi Memleket basshysy. Nursultan Nazarbaev barsha qazaqstandyqtar úshin ortaq maqsat – respýblıkamyzdyń 2050 jylǵa qaraı álemdegi eń damyǵan 30 eldiń  qataryna qosylý ekenin atap kórsetti. – Biz eńbektiń, bereke-birliktiń jáne turaqtylyqtyń arqasynda damyp kelemiz. Búkil álemde jumys oryndary qysqaryp jatqan ýaqytta ındýstrııalyq-ınnovasııalyq baǵdarlama aıasynda biz 60 myń jumys ornyn ashtyq, «Jumyspen qamtý – 2020» baǵdarlamasy boıynsha jumyspen qamtamasyz etip, jańa kásipke oqytýdamyz. Buǵan qosa, men óz jarlyǵymmen bıýdjettik uıymdar jumysshylarynyń eńbekaqysyn arttyrýdy tapsyrdym. Meniń sheshimime qoldaý kórsetken, sondaı-aq óz ujymdarynyń eńbekaqasyn arttyrǵan barlyq kompanııaǵa alǵys aıtamyn, – dedi Qazaqstan Prezıdenti. Sońynda Memleket basshysy barshany merekemen taǵy da quttyqtap, tynyshtyq, kelisim, Otanǵa jáne óz jaqyndaryna súıispenshilik tiledi. Derekkóz: Aqorda. kz. Foto: «Habar» telearnasy.