«Bizdiń basty maqsatymyz – qańtar tragedııasynan keıingi elimizdegi shynaıy reformalardy qoldaý. Birinshiden, Prezıdent bastaǵan eldi jańǵyrtatyn bastamalardy qoldap, olardy toqtatýǵa, sońyna ysyrýǵa, sabotajǵa jol bermeý. Ekinshiden, kez kelgen úlken saıası reformalar zań shyǵarýshy jáne ókiletti organnan bastalýy kerek ekeni sózsiz. Túpkilikti maqsatymyz – Májilistiń jumysyn jańa jolǵa, jańa arnaǵa burý. Onyń ishinde Májilistiń ashyqtyǵy, belsendi áńgime kóterip, ony qozǵaýy mańyzdy. Bul – úlken máseleniń biri», dedi Aıdos Sarym.
Ekinshiden, «Jańa Qazaqstan» toby Májilistiń reglamentin, Májilis týraly, Májilis depýtattary týraly zańnamany ózgertýge kúsh salmaq. A.Sarymnyń aıtýynsha, munyń bári depýtattardyń qolynda turǵan másele. «Elimizde júrgizilip jatqan bıýdjettik baǵdarlamalardyń tıimdiligin arttyrý maqsatynda Úkimetpen jáne basqa da memlekettik organdarmen qoıan-qoltyq jumys istep, talaptardy kúsheıtemiz. Jaqynda Prezıdent naýryz aıynda úlken saıası reformalar jarııalanatynyn aıtty. Soǵan belsene atsalysamyz. Elimizdegi reformalardyń durys júrgizilýin, onyń shyn máninde qoǵamnyń, halyqtyń talabynan shyǵýyn nazarda ustap, onyń belsendi sýbektisine aınalamyz. Úshinshiden, aımaqtaǵy ókiletti organdardyń jumysyn jandandyrý qajet. Qoǵamdyq keńesterge, máslıhattarǵa ózgerister kerek. Olarǵa jaqsy úlgi kórsetý kerek dep oılaımyz. Osy turǵyda da eńbek etemiz. Aldaǵy ýaqytta úndeýmen qatar, saıası qujattarymyzdy, ár reformanyń baǵyty boıynsha bólek usynystarymyzdy aıtamyz», dedi Aıdos Sarym.
Budan keıin sóz alǵan Natalıa Dementeva depýtattyq toptyń qurylý prosesine toqtaldy. Onyń aıtýynsha, «Jańa Qazaqstan» depýtattyq toby Parlament reglamentine sáıkes qurylǵan. Arnaýly prosedýra júrgizilgen. «Zańǵa sáıkes barlyq qujatty tirkeýge jiberdik. Iаǵnı depýtattyq toptyń erejesi jasaldy. Sol erejege sáıkes, depýtattardyń quqyqtary, múmkindikteri ázirlendi. Sonyń bári erejede jazylǵan. Topty qurmas buryn barlyq áriptesimizben aqyldasa kele Parlament jumysyna transformasııa qajet degen bir sheshimge keldik. Osy transformasııany «Jańa Qazaqstan» depýtattyq tobyn qurý arqyly jasamaqpyz. Negizgi jumys osydan bastalady», dedi Natalıa Dementeva.
Onyń aıtýynsha, depýtattyq top úsh shaǵyn salaǵa bólingen. Birinshi baǵyt agroónerkásip kesheni, ónerkásip, ekonomıka jáne ekologııany qamtymaq. Oǵan Edil Jańbyrshın jetekshilik etedi. Ekinshi sala – adam quqyqtary, qaýipsizdik jáne quqyqtyq reformalarǵa arnalǵan. Jetekshisi – Aıdos Sarym. Úshinshi salany Natalıa Dementeva basqarady. Bul áleýmettik mádenı damý jáne jastar saıasatyn qarastyrmaq. «Iаǵnı ár sektor arnaıy jasalǵan jospar, ereje boıynsha jumys isteıdi. Qoǵamda bolyp jatqan qandaı da bir máselelerdi, problemalardy shuǵyl sheshý, halyqqa kómek kórsetý, shuǵyl baılanysta bolý úshin osyndaı úsh sektor jasaqtalyp otyr. Bári zań aıasynda júzege asty, erejemiz bar», dedi Májilis depýtaty.
Osy oraıda Aıdos Sarym «Jańa Qazaqstan» depýtattyq tobynyń quqyqtaryna toqtaldy. Onyń aıtýynsha, parlamenttiń reglamenti men Konstıtýsııalyq Zań boıynsha depýtattyq top tirkelgennen keıin parlamenttik tyńdaý uıymdastyrýǵa, depýtattyq saýal joldaýǵa, kez kelgen úkimettik uıymnyń basshysyn shaqyrýǵa, esep alýǵa, qujattaryn suratýǵa qaqysy bar. «Esterińizde bolsa, sońǵy shaqyrylymda depýtattyq toptar bolǵan joq. Bizdiń jumysymyz úı ishinen úı tigý emes. Eń aldymen Májilistiń, Parlamenttiń jumysyn barynsha jandandyrýymyz, áleýetin durys paıdalanýymyz, ishki reformalardy júzege asyrýǵa kómektesýimiz kerek. Kóptegen baǵdarlamaǵa syn aıtyldy, aqıqat ta aıtyldy. Oǵan da bas-kóz bolý qajet. Oǵan da saıası qoldaý kerek», dedi A.Sarym.
Budan keıin sóz alǵan Berik Dúısenbınov «Aq jol» partııasynyń depýtattary bastamany qoldaǵanyn jetkizdi. Onyń aıtýynsha, qazir iske kóshetin kez keldi. «Osy ýaqytqa deıin qansha Joldaý jasaldy? Onyń qalaı oryndalǵany, nemen aıaqtalǵany týraly búginde anyq aqparat joq. Sondyqtan «Aq jol» partııasy osyndaı birlesken alańnyń arqasynda eldiń máselesin sheshýge múmkindik týsa, nelikten qosylmasqa degen sheshimge keldi. Bizdiń fraksııadan qarjy salasynyń belgili mamany Danııa Espaeva jáne men osy topqa kirdik», dedi B.Dúısenbınov.
Qazaqstannyń halyq partııasynyń ókili Ǵazız Qulahmetov óz sózinde Qazaqstannyń qoǵamdyq saıası ómirinde bolyp jatqan oqıǵalardan buǵan deıin de, qazir de tys qalmaıtynyn jetkizdi. «Muny emin-erkin oı bólisý múmkindigi bar qosymsha alań retinde qarastyryp otyrmyz. Saılaýshylar aldynda aıtqan sózderimizge adaldyǵymyzdy dáleldeımiz, rastaımyz. Munyń eń negizgi basty sharty – saıası mádenıetti qalyptastyrý», dedi Ǵ.Qulahmetov.
